நேரத்தை மிச்சப்படுத்த உயிரோடு விளையாட்டா..? ஓடும் ரயிலின் அடியில் தவழ்ந்து சென்ற பெண்கள்.. இணையத்தில் குவியும் கண்டனங்கள்…!!

சமூக வலைதளங்களில் சமீபத்தில் வைரலாகி வரும் ஒரு அதிர்ச்சியூட்டும் வீடியோவில், ரயில் நிலையத்தில் மெதுவாக நகர்ந்து கொண்டிருக்கும் ஒரு ரயிலின் அடியில் புகுந்து சில பயணிகள் தண்டவாளத்தைக் கடக்க முயல்கின்றனர். ரயில் முழுமையாகக் கடந்து செல்லும் வரை பொறுமையாகக் காத்திருக்காமல், தங்களின் நேரத்தைச் சேமிப்பதற்காக அவர்கள் மேற்கொண்ட இந்த அதீத அவசரச் செயல் பார்ப்பவர்களை நெஞ்சை பதற வைக்கிறது. இந்த ஆபத்தான முயற்சியில் சில பெண்களும் ஈடுபட்டிருப்பது அங்கிருந்த மற்ற பயணிகளையும், நெட்டிசன்களையும் பெரும் அதிர்ச்சியில் ஆழ்த்தியுள்ளது

இந்தக் காட்சியை அங்கிருந்த யாரோ ஒருவர் தனது மொபைல் போனில் பதிவு செய்து இணையத்தில் பகிரவே, இது நெட்டிசன்கள் மத்தியில் பெரும் விவாதத்தைக் கிளப்பியுள்ளது. வீடியோவை எடுத்த நபர் மற்றும் சமூக ஊடகப் பயனர்கள் பலரும், “ஒரு சில நிமிடங்களை மிச்சப்படுத்த மக்கள் ஏன் தங்களின் விலைமதிப்பற்ற உயிரைப் பணையம் வைக்கிறார்கள்?” என்று கேள்வி எழுப்பியுள்ளனர். ரயிலின் அடியில் தவழ்ந்து செல்லும் போது எதிர்பாராதவிதமாக ரயிலின் வேகம் அதிகரித்திருந்தால் என்னவாகியிருக்கும் என்று மக்கள் தங்களின் பயத்தையும், இத்தகைய முட்டாள்தனமான செயலுக்கு எதிரான கண்டனங்களையும் பதிவிட்டு வருகின்றனர்.

இத்தகைய அலட்சியமான சம்பவங்கள் தொடர்ந்து அதிகரித்து வருவதால், ரயில்வே நிர்வாகம் பயணிகளுக்கு மீண்டும் கடுமையான எச்சரிக்கைகளை விடுத்துள்ளது. ஓடும் ரயிலில் ஏறவோ, இறங்கவோ முயல்வதும், தண்டவாளங்களை ஆபத்தான முறையில் கடப்பதும் சட்டப்படி குற்றமாகும் மற்றும் உயிருக்கே ஆபத்தானது என்று ரயில்வே துறை தொடர்ந்து அறிவுறுத்தி வருகிறது. மக்கள் எப்போதும் அவசரப்படாமல் பொறுமையைக் கடைப்பிடிக்க வேண்டும் என்றும், தண்டவாளங்களைக் கடக்க மேம்பாலங்கள் அல்லது அதற்கென ஒதுக்கப்பட்ட பாதுகாப்பான பாதைகளைப் மட்டுமே பயன்படுத்த வேண்டும் என்றும் சமூக ஆர்வலர்கள் வலியுறுத்துகின்றனர்.