காதல் திருமணம் செய்துகொண்டால் வாழ்க்கை சொர்க்கமாக இருக்கும் என்ற பொதுவான பிம்பத்தை உடைக்கும் விதமாக, ஆந்திராவைச் சேர்ந்த ஒரு மாற்றுத்திறனாளிப் பெண்ணின் உருக்கமான கதை சமூக வலைதளங்களில் அதிர்ச்சியை ஏற்படுத்தியுள்ளது. இடுப்புக்குக் கீழே போலியோவால் பாதிக்கப்பட்ட அந்தப் பெண், தனது காதலனை நம்பி 12 ஆண்டுகளுக்கு முன்பு திருமணம் செய்துகொண்டார். ஆனால், திருமணத்திற்குப் பிறகு அவர் சந்தித்தது நரக வேதனை மட்டுமே. சமீபத்தில் தனது கணவனின் பையில் ஆணுறை பாக்கெட் இருந்ததைக் கண்டதும், அவர் கட்டிக்காத்த ஒட்டுமொத்த நம்பிக்கையும் சிதைந்து போயுள்ளது.
தனது குழந்தைகளின் படிப்புக்காகவும், இரண்டு நேர உணவுக்காகவும் கணவனின் அடி, உதை மற்றும் வசவுச் சொற்களைப் பொறுத்துக் கொண்டு வாழ்ந்து வந்ததாக அந்தப் பெண் வேதனையுடன் தெரிவித்துள்ளார். “இந்தத் திருமணத்தைக் காப்பாற்ற என் வாழ்க்கை, கனவுகள், உடல் என அனைத்தையும் இழந்துவிட்டேன்; சமுதாயத்தால் ஒதுக்கப்பட்டு, ஒவ்வொரு நொடியும் சித்திரவதையை அனுபவித்தேன்” என்று அவர் பதிவிட்டுள்ளார். கணவனின் துரோகம் வெளிச்சத்திற்கு வந்த பின், தான் மனரீதியாக முற்றிலும் உடைந்து போய்விட்டதாக அவர் கதறியுள்ளார்.
சமூக வலைதளங்களில் இந்தப் பதிவு வேகமாகப் பரவி வரும் நிலையில், “காதல் திருமணம் செய்தாலே எல்லாம் சரியாகிவிடும்” என்ற மாயையை இது கேள்விக்குள்ளாக்குகிறது. வெளியில் சொல்ல முடியாமல் மௌனமாகத் துயரங்களைச் சுமக்கும் பல பெண்களுக்குப் பிரதிநிதியாக, இந்தப் பெண் தைரியமாகத் தனது நிலையை வெளிப்படுத்தியுள்ளார். இவருக்கு நீதி கிடைக்க வேண்டும் என்றும், இத்தகைய கொடுமைகளுக்கு எதிராகச் சட்டம் கடுமையான நடவடிக்கை எடுக்க வேண்டும் என்றும் நெட்டிசன்கள் கோரிக்கை விடுத்து வருகின்றனர்.