கடலூர் மாவட்டம் சிதம்பரத்தில் குடும்பக் கட்டுப்பாடு அறுவை சிகிச்சை செய்துகொண்ட பெண் உயிரிழந்த சம்பவம், மருத்துவத்துறையின் அலட்சியத்தை வெளிச்சம் போட்டுக் காட்டியுள்ளது. சிதம்பரம் கோதண்டராமபுரம் வெள்ளச்சிகுப்பம் கிராமத்தைச் சேர்ந்த 31 வயதான விமலா, மூன்று குழந்தைகளுக்குத் தாயான நிலையில், குடும்பக் கட்டுப்பாடு அறுவை சிகிச்சைக்காக கடந்த பிப்ரவரி மாதம் சிதம்பரம் அரசு மருத்துவமனையில் அனுமதிக்கப்பட்டார். அங்கு அவருக்கு அறுவை சிகிச்சை செய்யப்பட்ட பிறகு, உடல்நலக் குறைவு ஏற்பட்டு அடுத்தடுத்த தொடர் பாதிப்புகளைச் சந்தித்துள்ளார்.
அறுவை சிகிச்சை முடிந்த சில நாட்களிலேயே தையல் போட்ட இடத்தில் தொற்று ஏற்பட்டு, மீண்டும் 20 நாட்கள் மருத்துவமனையில் சிகிச்சை பெற்று வீடு திரும்பியுள்ளார் விமலா. இருப்பினும், மார்ச் 16-ஆம் தேதி அறுவை சிகிச்சை செய்த இடத்தில் தையல் பிரிந்து ரத்தக் கசிவு ஏற்பட்டதால், அவர் மீண்டும் தீவிர சிகிச்சைக்காக அனுமதிக்கப்பட்டார். ஆனால், நிலைமை மோசமடைந்ததைத் தொடர்ந்து விழுப்புரம் முண்டியம்பாக்கம் அரசு மருத்துவக் கல்லூரி மருத்துவமனைக்கு மாற்றப்பட்ட அவர், அங்கு சிகிச்சை பலனின்றி பரிதாபமாக உயிரிழந்தார்.
விமலாவின் மரணத்திற்குச் சிதம்பரம் அரசு மருத்துவமனை மருத்துவர்களின் அசாத்தியமான அலட்சியமே காரணம் என்று கூறி, அவரது உறவினர்கள் மருத்துவமனை முன்பாக திடீர் சாலை மறியலில் ஈடுபட்டனர். உரிய முறையில் சிகிச்சை அளிக்காதது மற்றும் அறுவை சிகிச்சையின் போது ஏற்பட்ட குளறுபடிகள் காரணமாகவே இளம் தாய் உயிரிழந்துள்ளார் என்றும், இதற்கு காரணமான மருத்துவர்கள் மீது கடும் நடவடிக்கை எடுக்க வேண்டும் என்றும் போராட்டக்காரர்கள் ஆவேசமாக முழக்கமிட்டனர்.
தகவலறிந்து வந்த தாசில்தார் ஹரிதாஸ் மற்றும் காவல் துறையினர் நடத்திய பேச்சுவார்த்தையில், பிரேதப் பரிசோதனை அறிக்கை வந்த பிறகு உரிய நடவடிக்கை எடுக்கப்படும் என உறுதி அளித்தனர். இதை ஏற்று மறியல் கைவிடப்பட்டாலும், மூன்று குழந்தைகளைத் தவிக்கவிட்டுச் சென்ற தாயின் மரணம் அந்தப் பகுதியில் பெரும் சோகத்தையும் பரபரப்பையும் ஏற்படுத்தியுள்ளது. தற்போது போலீசார் இது குறித்து வழக்குப்பதிவு செய்து தீவிர விசாரணை மேற்கொண்டு வருகின்றனர்.