150 சவரன் நகையுடன் திடீரென மாயமான மனைவி… இன்ஸ்டாகிராம் மெசேஜால் அம்பலமான பரபரப்பு உண்மை…. கணவனுக்கு காத்திருந்த பேரதிர்ச்சி….!

சென்னை வடபழனியைச் சேர்ந்த ஆதித்தன் என்பவருக்கும் இலக்கியா என்பவருக்கும் கடந்த 2015-ம் ஆண்டு பெற்றோர் சம்மதத்துடன் திருமணம் நடைபெற்று, ஒரு மகனும் உள்ளார். ஆரம்பத்தில் இவர்களது குடும்ப வாழ்க்கை சுமுகமாகச் சென்றாலும், கடந்த சில வருடங்களாக இருவருக்கும் இடையே கருத்து வேறுபாடும் தகராறும் அதிகரித்து வந்துள்ளது. இந்தச் சூழலில், வீட்டில் இருந்த 150 சவரன் தங்க நகைகளை எடுத்துக்கொண்டு, தனது குழந்தையுடன் இலக்கியா திடீரென மாயமானார். மனைவியையும் மகனையும் காணாமல் அதிர்ச்சியடைந்த ஆதித்தன், பல இடங்களில் தேடிப் பார்த்தும் பலனில்லாததால் வடபழனி காவல் நிலையத்தில் புகார் அளித்தார்.

கணவர் கொடுத்த புகாரின் பேரில் காவல் துறை உடனடி நடவடிக்கை எடுக்கத் தாமதித்ததாகக் கூறப்படுகிறது. இதற்குக் காரணம், தன் மீதான காவல்துறை நடவடிக்கையைத் திசைதிருப்பும் நோக்கில், கணவர் ஆதித்தன் மீது இலக்கியா பல்வேறு பொய் புகார்களைப் பதிவு செய்துள்ளார். இதனால் ஆரம்பத்தில் வழக்கு விசாரணைத் தேக்கமடைந்தது. இருப்பினும் பின்வாங்காத ஆதித்தன், நீதி வேண்டி நீதிமன்றத்தை நாடினார். மனுவை விசாரித்த நீதிமன்றம், வழக்கின் தீவிரத்தைக் கருத்தில் கொண்டு உடனடியாகத் தீவிர விசாரணை நடத்தக் காவல் துறைக்குக் கடுமையான உத்தரவுகளைப் பிறப்பித்தது.

நீதிமன்ற உத்தரவைத் தொடர்ந்து வடபழனி போலீசார் விசாரணையை முடுக்கிவிட்டபோதுதான் பல அதிர்ச்சி தகவல்கள் வெளியாகின. இலக்கியாவிற்கு ஜிஷ்னு என்பவருடன் கடந்த 6 ஆண்டுகளாகத் தொடர்பு இருந்தது தெரியவந்தது. மேலும், ஜிஷ்னுவின் சகோதரருக்கு இன்ஸ்டாகிராமில் இலக்கியா அனுப்பிய குறுஞ்செய்திகளில், ஜிஷ்னுவுடன் பல இடங்களுக்குச் சென்றது, தனிமையில் சந்தித்தது மற்றும் அதனால் கர்ப்பமடைந்து கலைத்தது உள்ளிட்ட பல விவரங்களைக் குறிப்பிட்டிருந்தார். இந்தச் சான்றுகள் வழக்கில் திருப்புமுனையை ஏற்படுத்தின.

நவீன தொழில்நுட்ப உதவியுடன் கேரளாவில் பதுங்கியிருந்த இலக்கியாவின் இருப்பிடத்தைக் கண்டறிந்த வடபழனி காவல் நிலையத் தனிப்படை போலீசார், அவரை அதிரடியாகக் கைது செய்து சென்னைக்கு அழைத்து வந்தனர். இலக்கியாவிடம் தொடர்ந்து விசாரணை நடத்தப்பட்டு வருவதோடு, அவர் திருடிச் சென்ற 150 சவரன் நகைகளை மீட்கும் பணியிலும் போலீசார் தீவிரமாக ஈடுபட்டுள்ளனர். நீதிமன்றத்தில் ஆஜர்படுத்தப்பட்ட இலக்கியாவைச் சிறையில் அடைப்பதற்கான சட்டப்பூர்வ நடவடிக்கைகள் தற்போது துரிதமாக நடைபெற்று வருகின்றன.