“எனக்கு சிலிண்டர் இல்லையா..?” ஏஜென்சி வளாகத்தில் கதறி அழுத பெண்… ஒரு சிலிண்டருக்கு இப்படியா..? கொந்தளிக்கும் இணையவாசிகள்…!!

மத்தியப் பிரதேச மாநிலம் மொரேனாவில், சமையல் எரிவாயு சிலிண்டர் கிடைக்காத விரக்தியில் பெண் ஒருவர் எரிவாயு ஏஜென்சி வளாகத்திலேயே அழுது அடம் பிடித்த சம்பவம் பெரும் பரபரப்பை ஏற்படுத்தியுள்ளது. மொரேனாவின் ஜூரா பகுதியில் எடுக்கப்பட்ட இந்த வீடியோ சமூக வலைதளங்களில் வேகமாக வைரலாகி வருகிறது. பல நாட்களாக சிலிண்டர் கேட்டு அலைந்தும், எரிவாயு நிறுவன ஊழியர்கள் வழங்க மறுத்ததால், அந்தப் பெண் நிலைகுலைந்து தரையில் அமர்ந்து கதறி அழுத காட்சி காண்போரை கலங்கச் செய்துள்ளது.

சம்பவத்தின் போது உணர்ச்சி வசப்பட்ட அந்தப் பெண் ஆக்ரோஷமாக அழுது சத்தமிட்டதைக் கண்ட அங்கிருந்த சிலர், அவருக்கு ‘காளி மாதா’ அருள் வந்துவிட்டதாகவோ அல்லது பேய் பிடித்துவிட்டதாகவோ தவறாகக் கருதியுள்ளனர். ஆனால், உண்மையில் அடிப்படைத் தேவையான எரிவாயு கிடைக்காத விரக்தியே அவரை அந்த நிலைக்குத் தள்ளியுள்ளது. இந்தத் தருணத்தை அங்கிருந்தவர்கள் செல்போனில் படம்பிடித்துப் பகிர, அது தற்போது நாடு முழுவதும் விவாதப் பொருளாக மாறியுள்ளது.

சமீப நாட்களாக மொரேனா பகுதியில் வீட்டு உபயோக எரிவாயு விநியோகத்தில் கடும் சிக்கல் நீடித்து வருவதாக உள்ளூர்வாசிகள் குற்றம் சாட்டுகின்றனர். நுகர்வோர் பலமுறை ஏஜென்சிகளுக்குச் சென்றும் சிலிண்டர்கள் கிடைக்காமல் அலைக்கழிக்கப்படுவதால் இத்தகைய அசாதாரண சூழல்கள் ஏற்படுகின்றன. இந்த வீடியோ குறித்து எரிவாயு நிறுவனமோ அல்லது மாவட்ட நிர்வாகமோ இதுவரை அதிகாரப்பூர்வ விளக்கம் அளிக்கவில்லை என்றாலும், சாமானிய மக்களின் அவலநிலையை இந்தச் சம்பவம் வெளிச்சம் போட்டுக் காட்டியுள்ளது.