இன்றைய காலகட்டத்தில், 25 முதல் 30 வயதிற்குள் கோடிகளில் வங்கி இருப்பு, சொந்த வீடு, கார் மற்றும் சொகுசுப் பொருட்கள் என மிக விரைவாகப் பணக்காரராக வேண்டும் என்ற பேராசை பல இளைஞர்களிடம் அதிகரித்து வருகிறது. இந்த அவசர ஆசையே அவர்களைத் திருட்டு, ஊழல், நம்பவைத்து ஏமாற்றுவது போன்ற தவறான பாதைகளுக்குத் தள்ளுகிறது. குறுக்குவழியில் சம்பாதிக்கும் இந்த ஆசை, பிரச்சினைகளைத் தீர்ப்பதற்குப் பதிலாக அவர்களின் ஒட்டுமொத்த எதிர்காலத்தையும் கேள்விக்குறியாக்கிச் சிறைக்குள் தள்ளுகிறது என்பதற்குச் சமீபத்திய நிகழ்வுகள் சாட்சியாக அமைகின்றன.
அத்தகைய ஒரு துயரச் சம்பவமாக, சென்னை கோவில்ம்பாக்கம் பூபதி நகரைச் சேர்ந்த மருத்துவர் கார்த்திக் என்பவரது வீட்டில் வேலை செய்து வந்த ஆர்த்தி (19) என்ற இளம்பெண் தனது காதலனுக்காகத் திருட்டு வழியில் இறங்கியுள்ளார். தனியார் மருத்துவமனைகளில் பணியாற்றும் மருத்துவர் தம்பதியினர், மயிலாடுதுறையைச் சேர்ந்த ஆர்த்தியை கடந்த 3 மாதங்களுக்கு முன்பு வீட்டு வேலைக்காகச் சேர்த்திருந்தனர். இந்நிலையில், வேலை முடிந்து வீடு திரும்பிய தம்பதியினர், பீரோவிலிருந்த ரூ.30 ஆயிரம் ரொக்கம், பட்டுப்புடவைகள் மற்றும் 10 பவுன் நகைகள் இருந்த சூட்கேஸ் ஆகியவை மாயமானதைக் கண்டு அதிர்ச்சியடைந்தனர்.
இதுகுறித்து பள்ளிக்கரணை குற்றப்பிரிவு காவல்துறையில் புகார் அளிக்கப்பட்டதை அடுத்து, அடுக்குமாடி குடியிருப்பின் கண்காணிப்பு கேமரா பதிவுகள் தீவிரமாக ஆய்வு செய்யப்பட்டன. அதில், ஆர்த்தி ஒரு சூட்கேஸ் மற்றும் பைகளுடன் தப்பிச் செல்லும் காட்சிகள் பதிவாகியிருந்ததுடன், அவர் தலைமறைவாகியிருந்ததும் தெரியவந்தது. உடனடியாக காவல்துறையினர் சைபர் மற்றும் செல்போன் சிக்னல்கள் உதவியுடன், சென்னை பாரிமுனையில் உள்ள ஒரு தங்கும் விடுதியில் அவர் பதுங்கியிருப்பதைக் கண்டுபிடித்தனர்.
இதையடுத்து, அங்கு அதிரடி சோதனை நடத்திய தனிப்படை காவல்துறையினர் ஆர்த்தியையும், அவருடன் இருந்த அவரது காதலன் அபினேஷ் (22) என்பவரையும் கைது செய்தனர். மேலும், அவர்களிடமிருந்து திருடப்பட்ட நகைகள், பணம் மற்றும் உடமைகள் அனைத்தும் முழுமையாகப் பறிமுதல் செய்யப்பட்டு, இருவரும் நீதிமன்றத்தில் ஆஜர்படுத்தப்பட்டுச் சிறையில் அடைக்கப்பட்டனர். புகார் அளிக்கப்பட்ட 24 மணி நேரத்திற்குள் துரிதமாகச் செயல்பட்டுக் குற்றவாளிகளைக் கைது செய்த காவல்துறையினருக்குப் பாராட்டுக்கள் குவிந்தாலும், சொகுசு வாழ்க்கைக்கு ஆசைப்பட்டு இளம் வயதைக் தொலைக்கும் இத்தகைய சம்பவங்கள் சமுதாயத்திற்கு ஒரு எச்சரிக்கையாகவே அமைகின்றன.