வரலாறு காணாத களையெடுப்பு… 20 மாவட்ட செயலாளர்களின் பதவிகள் காலி?… கட்சிக்குள் தொடங்கும் அடுத்தகட்ட அரசியல் யுத்தம்…!!

சென்னை அண்ணா அறிவாலயத்தில் சமீபத்தில் நடைபெற்ற தி.மு.க. செயற்குழுக் கூட்டத்தில், கட்சியை மறுசீரமைக்கும் வகையிலும் புதியவர்களுக்கு வாய்ப்பளிக்கும் வகையிலும் பல அதிரடி முடிவுகள் எடுக்கப்பட்டுள்ளன. கட்சித் தலைவர் மு.க.ஸ்டாலின் முன்னிலையில் எடுக்கப்பட்ட இந்த முடிவுகளின்படி, கிளைச் செயலாளர் முதல் மாவட்டச் செயலாளர் வரையிலான பதவிகளுக்கு புதிய கட்டுப்பாடுகள் விதிக்கப்பட்டுள்ளன. குறிப்பாக, மாவட்டச் செயலாளர் பொறுப்பில் இருப்பவர்களுக்கு அதிகபட்சமாக 70 வயது வரம்பு நிர்ணயிக்கப்பட்டுள்ளதுடன், ஒருவர் அதிகபட்சமாக மூன்று முறை மட்டுமே அப்பதவியில் நீடிக்க முடியும் என்ற புதிய விதியும் கொண்டுவரப்பட்டுள்ளது.

இந்த புதிய கட்டுப்பாடுகளால், கட்சியில் நீண்ட காலமாகப் பொறுப்பில் இருந்த மூத்த நிர்வாகிகள் பலரும் அதிர்ச்சியடைந்துள்ளனர். செயற்குழுவில் எடுக்கப்பட்ட இந்த முடிவுகளை அடுத்த 15 நாட்களுக்குள் உடனடியாக நடைமுறைப்படுத்த வேண்டும் என உத்தரவிடப்பட்டுள்ளது. இதன் காரணமாக, 70 வயதைக் கடந்த 13 பேர் உட்பட சுமார் 20-க்கும் மேற்பட்ட தற்போதைய மாவட்டச் செயலாளர்கள் தங்களது பதவிகளை இழக்க நேரிடும் எனத் தெரிகிறது. கட்சியின் இந்த அதிரடி நடவடிக்கை தி.மு.க. வட்டாரத்தில் பெரும் பரபரப்பை ஏற்படுத்தியுள்ளது.

இவ்வாறு பதவி இழக்க வாய்ப்புள்ள மூத்த தலைவர்களின் பட்டியலில் பல முக்கிய அமைச்சர்களும் முன்னணி நிர்வாகிகளும் இடம்பெற்றுள்ளனர். வயது மற்றும் பதவிக்கால வரம்பின் அடிப்படையில் ஆவுடையப்பன், ஆர்.காந்தி, சாத்தூர் ராமச்சந்திரன், ஏ.வ.வேலு, எம்.ஆர்.கே.பன்னீர்செல்வம், தா.மோ.அன்பரசன், அனிதா ராதாகிருஷ்ணன், சுந்தர், கோ.தளபதி உள்ளிட்ட பல முக்கியத் தலைவர்கள் இந்த புதிய விதிகளுக்குள் வருகின்றனர். இதன் மூலம் கட்சியில் அடுத்த கட்ட தலைமுறைக்கு வழிவிடப்படுவதாக அரசியல் நோக்கர்கள் கருதுகின்றனர்.