விஜய் கட்சித் தொடங்கிய காலத்திலிருந்தே சமூக வலைதளங்களில் அவரை அல்லது அவரது கட்சியை விமர்சிப்பவர்களை, தவெக ஆதரவாளர்கள் மற்றும் ‘விர்ச்சுவல் வாரியர்ஸ்’ (Virtual Warriors) என்ற பெயரில் இருப்பவர்கள் மிகவும் ஆபாசமாகவும், கீழ்த்தரமாகவும் விமர்சித்து வருவதாகக் குற்றச்சாட்டு எழுந்துள்ளது. விஜய்யின் தனிப்பட்ட வாழ்க்கை, குறிப்பாக அவரது மனைவியுடனான விவாகரத்து விவகாரத்தின் போது கூட, அவரது ஆதரவாளர்கள் பெண்களை மிக மோசமாகப் பேசியபோது விஜய் மௌனம் காத்தது விமர்சனத்திற்குள்ளானது. பிற கட்சியைச் சேர்ந்த பெண் அரசியல்வாதிகள் மற்றும் விமர்சகர்களைத் தவெகவினர் இழிவுபடுத்தும் போது விஜய் அவர்களைக் கண்டிக்காமல் இருப்பது ஒருதலைப்பட்சமான செயல் எனப் பலரும் சுட்டிக்காட்டி வருகின்றனர்.
இந்நிலையில், சமீபத்தில் அரசியல் விமர்சகர் பொன்ராஜ் என்பவர் விஜய்க்கு ஆதரவாகப் பேசிய சில பெண்களை அவதூறாக விமர்சித்ததற்காக, விஜய் நேரில் சென்று டிஜிபி அலுவலகத்தில் புகார் அளித்தது அரசியல் வட்டாரத்தில் பேசுபொருளாகியுள்ளது. இதன் விளைவாகப் பொன்ராஜ் மன்னிப்பு கேட்கும் நிலைக்குத் தள்ளப்பட்டார். பெண்களின் கண்ணியத்தைக் காக்க விஜய் எடுத்த இந்த நடவடிக்கை ஒருபுறம் பாராட்டப்பட்டாலும், அதே தவெகவினர் மற்றவர்களை இழிவுபடுத்தும் போது ஏன் விஜய் நடவடிக்கை எடுப்பதில்லை என்ற கேள்வி எழுப்பப்பட்டுள்ளது.
இது குறித்துச் செய்தியாளர்களிடம் பேசிய நாம் தமிழர் கட்சியின் ஒருங்கிணைப்பாளர் சீமான், விஜய்யின் இந்த இரட்டை நிலையை கடுமையாகச் சாடியுள்ளார். தவெகவினர் தன்னைப்பற்றியும், தனது குடும்பம் மற்றும் அஜித், சிவகார்த்திகேயன் போன்றோரின் குடும்பங்களைப் பற்றியும் இழிவாகப் பேசியதை ஒரு புத்தகமாகவே போடலாம் என்றும், அப்போதெல்லாம் விஜய் எங்கே போனார் என்றும் சீமான் கேள்வி எழுப்பியுள்ளார். “உங்கள் கட்சிப் பெண்கள் எல்லை மீறிப் பேசும் போதே அவர்களைக் கண்டித்திருந்தால், இன்று நீங்கள் புகார் கொடுக்கச் சென்றதற்கு ஒரு தகுதி இருந்திருக்கும். என்னைப் பற்றிப் பேசியதற்காக நான் உங்கள் மீது புகார் கொடுக்கவா?” எனச் சீமான் ஆவேசமாகக் கேள்வி எழுப்பியது அரசியல் தளத்தில் பெரும் பரபரப்பை ஏற்படுத்தியுள்ளது.