ஸ்மார்ட்போன்களில் இடவசதி குறைவதற்குப் புகைப்படங்கள் மற்றும் வீடியோக்கள் மட்டுமே காரணமல்ல. செயலிகளின் பின்னணியில் சேமிக்கப்படும் ‘கேச்’ கோப்புகளும் முக்கியக் காரணியாகும். இன்ஸ்டாகிராம், யூடியூப் போன்ற செயலிகளைப் பயன்படுத்தும் போது அவை தற்காலிகமாகச் சேமித்துக்கொள்ளும் தரவுகளைச் செட்டிங்ஸ் பகுதிக்குச் சென்று அவ்வப்போது நீக்க வேண்டும். அதேபோல், வாட்ஸ்அப் செயலியில் தேவையற்ற குழுக்களில் இருந்து வரும் அதிகப்படியான கோப்புகளை ‘மேனேஜ் ஸ்டோரேஜ்’ வசதி மூலம் அகற்றுவதும், தானியங்கிப் பதிவிறக்கத்தை முடக்கி வைப்பதும் போனின் வேகத்தை அதிகரிக்கவும் அதிக இடத்தைக் காலி செய்யவும் உதவும்.
மொபைலில் இருந்து நீக்கப்பட்ட கோப்புகள் உடனடியாக அழிந்துவிடாமல் Trash அல்லது ‘பின்’ பகுதியில் தங்கியிருக்கும் என்பதால், அங்கேயும் சென்று அவற்றை முழுமையாக அப்புறப்படுத்துவது அவசியமாகும். மேலும், பதிவிறக்கம் செய்யப்பட்ட பழைய பிடிஎஃப் கோப்புகள் மற்றும் பயன்படுத்தாத செயலிகளை அடையாளம் கண்டு நீக்குவதன் மூலம் 10ஜிபி வரை கூடுதல் இடத்தைப் பெற முடியும். கூகுள் ஃபைல்ஸ் (Files by Google) போன்ற கருவிகளைப் பயன்படுத்தி மாதத்திற்கு ஒருமுறை கைபேசியைச் சீரமைக்கும் பழக்கத்தை ஏற்படுத்திக்கொண்டால், மொபைல் ஹேங் ஆகாமல் நீண்ட காலம் மென்மையாகச் செயல்படும்.