விஜய் டிவியின் ‘குக் வித் கோமாளி’ நிகழ்ச்சியில் பங்கேற்ற தர்பூசணி திவாகர், அங்குள்ள சக கலைஞர்கள் தன்னைத் தாக்கியதாகப் புகார் அளித்திருந்த நிலையில், தற்போது அவருக்கு எதிராகப் பல திடுக்கிடும் தகவல்கள் வெளியாகியுள்ளன. திவாகர் பெண் போட்டியாளர்களிடம் மிகவும் அநாகரீகமாக நடந்து கொண்டதாகவும், அதன் காரணமாகவே அவர் நிகழ்ச்சியில் இருந்து நீக்கப்பட்டார் என்றும் மாகாபா ஆனந்த் மற்றும் புகழ் தரப்பில் தெரிவிக்கப்பட்டது. இந்நிலையில், அறந்தாங்கி நிஷா வெளியிட்டுள்ள வீடியோவில், திவாகர் தன் மீதும் மற்ற பெண் கலைஞர்களிடமும் அருவருக்கத்தக்க வகையில் நடந்து கொண்டதாக பகிரங்கமாகக் குற்றம் சாட்டியுள்ளார்.
நிகழ்ச்சியில் நடந்த உண்மைச் சம்பவங்களை மறைத்துவிட்டு திவாகர் பொய் புகார் அளித்துள்ளதாகவும், அவர் மீது உரிய நடவடிக்கை எடுக்க அனைத்துப் பெண் போட்டியாளர்களும் தயாராக இருப்பதாகவும் நிஷா தெரிவித்துள்ளார். இதற்கிடையே, தனியார் ஊடகப் பேட்டியின் போது நிஷாவின் வீடியோவை நிருபர் காட்ட முயன்றதால் ஆத்திரமடைந்த திவாகர், கேமராவை உடைத்துவிட்டு அங்கிருந்து தப்பியோடியுள்ளார். பிக் பாஸ் விமர்சகர் ஜோ மைக்கேல் இந்த வீடியோவைப் பகிர்ந்து திவாகருக்கு எதிராகப் பல ஆதாரங்கள் தயாராக இருப்பதாக எச்சரித்துள்ளதால், இந்த விவகாரம் சின்னத்திரை வட்டாரத்தில் பெரும் பரபரப்பை ஏற்படுத்தியுள்ளது.