டெல்லியில் இன்று காங்கிரஸ் தலைவர் மல்லிகார்ஜுன கார்கே தலைமையில் ‘இந்தியா’ (INDIA) கூட்டணிக் கட்சிகளின் ஆலோசனைக் கூட்டம் மிக முக்கிய அரசியல் சூழலுக்கு மத்தியில் நடைபெற்றது. சோனியா காந்தி, ராகுல் காந்தி, மல்வாப் பானர்ஜி, அகிலேஷ் யாதவ், தேஜஸ்வி யாதவ் உள்ளிட்ட 23 கட்சிகளின் முக்கியத் தலைவர்கள் பங்கேற்ற இக்கூட்டத்தில், வரவிருக்கும் நாடாளுமன்ற குளிர்காலக் கூட்டத்தொடரில் மத்திய அரசு கொண்டு வரத் திட்டமிட்டுள்ள ஒரே நாடு ஒரே தேர்தல், தொகுதி மறுவரையறை மற்றும் மகளிர் இடஒதுக்கீடு போன்ற முக்கிய மசோதாக்களைக் கூட்டாக எதிர்கொள்வது குறித்து ஆலோசிக்கப்பட்டது.
சமீபத்தில் தமிழ்நாட்டில் நடந்து முடிந்த சட்டமன்றத் தேர்தலில் திமுக கூட்டணி தோல்வியைத் தழுவிய நிலையில், தனிப்பெரும் கட்சியாக வெற்றி பெற்று தமிழக முதல்வராகப் பதவியேற்றுள்ள விஜய்யின் ‘தமிழக வெற்றிக் கழகத்திற்கு’ (தவெக) காங்கிரஸ் கட்சி ஆதரவு அளித்தது. தவெக-வுடன் காங்கிரஸ் கைகோர்த்ததால் திமுக – காங்கிரஸ் கூட்டணி முறிந்தது. இதன் காரணமாக, டெல்லியில் நடைபெற்ற இன்றைய இந்தியா கூட்டணிக் கூட்டத்தைப் புறக்கணிப்பதாக திமுக அதிரடியாக அறிவித்தது. இதேபோல், ஆம் ஆத்மி கட்சியின் ஒருங்கிணைப்பாளர் அரவிந்த் கெஜ்ரிவாலும் இக்கூட்டத்தைப் புறக்கணித்தார்.
தமிழகத்தில் காங்கிரஸுடன் கூட்டணி அமைத்துள்ள ஆளுங்கட்சியான தவெக இன்றைய கூட்டத்தில் பங்கேற்குமா என்ற பலத்த எதிர்பார்ப்பு நிலவியது. ஆனால், தவெக தரப்பில் யாரும் இக்கூட்டத்தில் கலந்து கொள்ளவில்லை. நாடாளுமன்ற உறுப்பினர்கள் (எம்.பி-க்கள்) இருக்கும் கட்சிகளுக்கு மட்டுமே இன்றைய கூட்டத்திற்கு அழைப்பு விடுக்கப்பட்டதால் தவெக-விற்கு அழைப்பு அனுப்பப்படவில்லை என்றும், வரும் நாட்களில் நடைபெறவிருக்கும் கூட்டங்களில் தவெக-விற்கு அழைப்பு விடுக்கப்படலாம் என்றும் காங்கிரஸ் கட்சி வட்டாரங்கள் தரப்பில் விளக்கம் அளிக்கப்பட்டுள்ளது.
கடந்த மாதம் டெல்லி சென்றிருந்த தமிழக முதல்வர் விஜய், பிரதமர் மோடி மற்றும் நிதியமைச்சரைச் சந்தித்த நிலையில் காங்கிரஸ் தலைவர்களைச் சந்திக்காமல் திரும்பியது விவாதப் பொருளானது. இந்நிலையில், வரும் 11-ஆம் தேதி நடைபெறவுள்ள நிதி ஆயோக் கூட்டத்தில் பங்கேற்க டெல்லி செல்லவிருக்கும் முதல்வர் விஜய், அந்தப் பயணத்தின் போது காங்கிரஸ் தலைவர்களைச் சந்திக்கக்கூடும் என எதிர்பார்க்கப்படுகிறது. இதற்கிடையே இன்றைய கூட்டத்தில் பேசிய கார்கே, மோடி அரசின் தவறான நிர்வாகத்தால் நாட்டுக்கு ஏற்பட்டுள்ள சவால்களை எதிர்கொள்ள எதிர்க்கட்சிகளின் ஒற்றுமை உணர்வை மேலும் வலுப்படுத்த வேண்டும் என வலியுறுத்தினார்.