ஈரான் ராணுவம் ஐக்கிய அரபு எமிரேட்ஸ் மற்றும் சவுதி அரேபியா மீது ஞாயிற்றுக்கிழமை நடத்திய தாக்குதல், உலக கச்சா எண்ணெய் சந்தையில் பெரும் அதிர்வலைகளை ஏற்படுத்தியுள்ளது. இதன் விளைவாக கச்சா எண்ணெய் விலை ராக்கெட் வேகத்தில் உயர்ந்து 110 டாலரைத் தாண்டியுள்ளது. கடந்த மாதம் மேற்கொள்ளப்பட்ட போர் நிறுத்த ஒப்பந்தம் தோல்வியில் முடிந்த நிலையில், அமெரிக்கா மற்றும் இஸ்ரேல் நாடுகள் ஈரான் மீது மீண்டும் போர் தொடுக்க தீவிர ஆலோசனைகளை மேற்கொண்டு வருகின்றன. குறிப்பாக, ஈரானின் எரிசக்தி நிலையங்கள், உள்கட்டமைப்பு மற்றும் ராணுவ இலக்குகளைத் தாக்குவதற்கான விரிவான திட்டங்களை அமெரிக்க பாதுகாப்பு அதிகாரிகள் தயார் செய்துள்ளதாக நியூயார்க் டைம்ஸ் தெரிவித்துள்ளது.
அமெரிக்க அதிபர் டொனால்ட் டிரம்ப் தலைமையில் நடைபெற்ற உயர்மட்ட ஆலோசனைக் கூட்டத்தில், ஈரானின் அணு ஆயுதத் திட்டங்களை முடக்கத் தேவையான நடவடிக்கைகள் குறித்து விவாதிக்கப்பட்டது. இதற்காக இஸ்ரேலின் உதவியுடன், ஈரானின் செறிவூட்டப்பட்ட யுரேனியம் இருப்பைக் கைப்பற்றும் சிறப்புப் படை நடவடிக்கைகள்கூட பரிசீலனையில் உள்ளன. இருப்பினும், இத்தகைய தரைவழி நடவடிக்கைகள் அமெரிக்க வீரர்களுக்குப் பெரும் ஆபத்தை விளைவிக்கும் என்பதால், இது குறித்த எச்சரிக்கையான அணுகுமுறையும் நிலவுகிறது. அதே வேளையில், கடந்த ஒரு மாதத்தில் ஈரான் தனது ஏவுகணைத் தளங்களை வலுப்படுத்தியுள்ளதாகவும், ஹார்முஸ் ஜலசந்தியைச் சுற்றியுள்ள பெரும்பாலான ஏவுகணைத் தளங்கள் இன்னும் பயன்பாட்டில் இருப்பதாகவும் அமெரிக்க உளவுத்துறை எச்சரித்துள்ளது.
இந்த மோதல் போக்கு உலகப் பொருளாதாரத்திற்குப் பெரும் அச்சுறுத்தலாக மாறியுள்ளது. ஏற்கனவே ஹார்முஸ் ஜலசந்தி வழியாக நடைபெறும் உலகின் 20 சதவீத எண்ணெய் வர்த்தகம் முடங்கியுள்ள சூழலில், புதிய தாக்குதல்கள் தொடங்கினால் கச்சா எண்ணெய் விலை மேலும் உயர்ந்து பணவீக்கத்தை உச்சத்திற்கு கொண்டு செல்லும். இந்தியா போன்ற எரிபொருள் இறக்குமதியை அதிகம் நம்பியிருக்கும் நாடுகள், பெட்ரோல் மற்றும் டீசல் விலை உயர்வால் பெரும் பொருளாதார நெருக்கடியைச் சந்திக்கும் அபாயம் உள்ளது. வளைகுடா நாடுகள் முழுவதும் போர் மேகங்கள் சூழ்ந்திருப்பது சர்வதேச வர்த்தகச் சூழலை பெரும் பதற்றத்தில் ஆழ்த்தியுள்ளது.
ஈரான் அணு ஆயுதத் திட்டத்தைக் கட்டுப்படுத்த வேண்டும் என்பதில் அமெரிக்கா பிடிவாதமாக உள்ளது. பாகிஸ்தான் மூலம் தற்போது பேச்சுவார்த்தைகள் நடந்து வந்தாலும், அவை இதுவரை எதிர்பார்த்த பலனைத் தரவில்லை. இதனால் போர் பதற்றம் தணியாத நிலையில், அமெரிக்கா – இஸ்ரேல் கூட்டணியின் ராணுவ நடவடிக்கைகள் உலக நாடுகளிடையே அச்சத்தை ஏற்படுத்தியுள்ளன. போர் நிறுத்த முயற்சிகள் தோல்வியுற்றால், வளைகுடாவில் ஏற்படப்போகும் ராணுவ மோதல் உலகளாவிய எரிசக்தி பாதுகாப்பைச் சிதைத்து, ஒட்டுமொத்தப் பொருளாதார அமைப்பையுமே நிலைகுலையச் செய்யும் என்று அஞ்சப்படுகிறது.