விஜய் நடித்துள்ள ‘ஜன நாயகன்’ திரைப்படம் தணிக்கைச் சிக்கல்களால் தள்ளிப்போயுள்ள நிலையில், படத்தின் இசை வெளியீட்டு விழாவில் அவர் பேசிய பழைய வீடியோ ஒன்று தற்போது சமூக வலைதளங்களில் மீண்டும் வைரலாகி வருகிறது. அந்த வீடியோவில் விஜய், “சாதாரணமாகவே எனது படங்களுக்கு ஏதேனும் ஒரு சிக்கல் வரும்; இப்போது நான் அரசியல் பாதையை நோக்கிப் பயணித்துக் கொண்டிருக்கும் வேளையில், இந்தப் படத்தைத் தயாரிப்பது குறித்துத் தயாரிப்பாளரிடம் கேட்டேன்” என்று வெளிப்படையாகப் பேசியுள்ளார். அரசியல் நகர்வுகளுக்கு மத்தியில் தயாரிப்பாளர் கேவிஎன் புரொடக்ஷன்ஸ் காட்டிய தைரியத்தைப் பாராட்டி அவர் பேசிய அந்தப் பேச்சு, தற்போதைய சூழலோடு ஒத்துப் போவதால் ரசிகர்கள் அதனைப் பகிர்ந்து வருகின்றனர்.
ஹெச். வினோத் இயக்கத்தில் உருவாகியுள்ள இப்படம் ஜனவரி 9, 2026 அன்று வெளியாகவிருந்த நிலையில், தணிக்கைச் சான்றிதழ் இன்னும் கிடைக்காததால் ரிலீஸ் தேதி குறிப்பிடாமல் ஒத்திவைக்கப்பட்டுள்ளது. இது தொடர்பாக சென்னை உயர் நீதிமன்றத்தில் தொடரப்பட்ட வழக்கின் தீர்ப்பு நாளை மறுதினம் வெளியாக உள்ளது. இந்தச் சட்டப் போராட்டங்களுக்கு இடையே, தனது அரசியல் வருகைக்கும் சினிமாவுக்கும் இடையிலான சவால்களை விஜய் முன்கூட்டியே கணித்துப் பேசியது திரையுலகில் உன்னிப்பாகக் கவனிக்கப்படுகிறது.