தமிழக வெற்றி கழகத்தின் (தவெக) முக்கிய அரசியல் வியூக வகுப்பாளரான ஜான் ஆரோக்கியசாமி, கட்சியிலிருந்து விலக உள்ளதாகத் தகவல்கள் வெளியாகியுள்ளன. கட்சியின் தேர்தல் வியூகங்கள், பிராண்டிங் மற்றும் மாநாடு திட்டமிடல் ஆகியவற்றில் முக்கியப் பங்காற்றிய அவர், சமீபகாலமாகப் புறக்கணிக்கப்படுவதாக அதிருப்தியில் இருப்பதாகக் கூறப்படுகிறது.
குறிப்பாக, ஆதவ் அர்ஜுனா தேர்தல் பிரசார மேலாண்மை பொதுச் செயலாளராக நியமிக்கப்பட்ட பிறகு, கட்சிக்குள் ஜான் ஆரோக்கியசாமியின் முக்கியத்துவம் குறைந்ததாகத் தெரிகிறது. தவெகவின் 3-ம் ஆண்டு தொடக்க விழாவை ஒட்டி ஆதவ் அர்ஜுனா அளித்த விருந்தில் ஜான் ஆரோக்கியசாமி கலந்துகொள்ளாதது, இருவருக்கும் இடையிலான மோதலை உறுதிப்படுத்தும் விதமாக அமைந்தது. ஜான் ஆரோக்கியசாமி வகுக்கும் வியூகங்களைச் செயல்படுத்தும் பொறுப்பு ஆதவ் அர்ஜுனாவிடம் வழங்கப்பட்ட நிலையில், அதிகாரப் பகிர்வு தொடர்பாக எழுந்த கருத்து வேறுபாடுகளே அவர் விலகத் திட்டமிடுவதற்கு முக்கியக் காரணமாகப் பார்க்கப்படுகிறது