பெரம்பூர் சட்டமன்றத் தொகுதியின் உள்கட்டமைப்பு வசதிகளை மேம்படுத்தி, அங்குள்ள நீண்டகால நகரப் பிரச்சினைகளுக்கு நிரந்தரத் தீர்வு காண சென்னை மாநகராட்சி தற்போது அதிரடி நடவடிக்கையில் இறங்கியுள்ளது. சுமார் 3 லட்சத்திற்கும் அதிகமான மக்கள் வசிக்கும் இத்தொகுதியை ஒரு முன்மாதிரித் தொகுதியாக மாற்றும் நோக்கில், ரூபாய் 48 லட்சம் மதிப்பில் விரிவான திட்ட அறிக்கை தயாரிப்பதற்கான புதிய டெண்டரை மாநகராட்சி வெளியிட்டுள்ளது. முதல்வர் விஜய்யின் வழிகாட்டுதலின்படி, இந்தத் தொகுதியை அடுத்த கட்டத்திற்கு கொண்டு செல்ல மிகப்பெரிய திட்டங்கள் வகுக்கப்பட்டு, அவை அதிவேகமாகச் செயல்படுத்தப்பட உள்ளன.
வியாசர்பாடி, எம்.கே.பி நகர், கொடுங்கையூர் போன்ற பெரம்பூர் தொகுதிக்கு உட்பட்ட பகுதிகள் நீண்டகாலமாகப் பல்வேறு சவால்களைச் சந்தித்து வருகின்றன. குறிப்பாக, தாழ்வான பகுதிகளில் வாழும் நடுத்தர மற்றும் அடித்தட்டு மக்கள் மழைக்கால வெள்ளம், குறுகிய சாலைகள், மோசமான நடைபாதைகள் மற்றும் குடிநீர் தட்டுப்பாடு ஆகியவற்றால் கடுமையாகப் பாதிக்கப்பட்டு வந்தனர். இவற்றுடன் கொடுங்கையூர் குப்பைக்கிடங்கு, கழிவுநீர் தேங்கும் கேப்டன் காட்டன் கால்வாய் போன்ற பெரிய சுற்றுச்சூழல் மற்றும் சுகாதாரப் பிரச்சினைகளும் இப்பகுதியில் பெரும் முடக்கத்தை ஏற்படுத்தி வந்துள்ளன.
இவற்றுக்கெல்லாம் முற்றுப்புள்ளி வைக்கும் வகையில், முதற்கட்டமாக 20 கிலோமீட்டர் நீளத்திற்கு புதிய சாலைகள் அமைக்கப்பட உள்ளன. முன்பு போல சாலை போடுவது, மழைநீர் வடிகால் அமைப்பது எனத் தனித்தனியாகப் பணிகளைச் செய்யாமல், சென்னை மாநகராட்சி முற்றிலும் புதிய உத்தியைக் கையாண்டுள்ளது. பகுதி மேம்பாட்டுத் திட்டத்தின் கீழ், ஒரே நேரத்தில் வடிகால் சுத்தம் செய்தல், சாலைகளை அகலப்படுத்துதல், நடைபாதை அமைத்தல் என அனைத்துப் பணிகளையும் ஒருங்கிணைந்து ஒட்டுமொத்தமாக ஒரே கட்டத்தில் முடிக்கத் திட்டமிடப்பட்டுள்ளது.
இந்த மெகா திட்டத்தின் கீழ் சாலை சீரமைப்பு, ஆக்கிரமிப்புகள் அகற்றம், பிரத்யேக மிதிவண்டிப் பாதைகள், முறையான வாகன நிறுத்தங்கள், நவீன தெருவிளக்குகள் மற்றும் புதிய பூங்காக்கள் ஆகியவை அமைக்கப்படவுள்ளன. இதற்காக சிவில் மற்றும் நகர்ப்புற திட்டமிடல் துறைகளில் 15 ஆண்டுகள் அனுபவம் வாய்ந்த நிபுணர்கள் அடங்கிய ஆலோசனைக் குழு அமைக்கப்பட்டு, ஜிஐஎஸ் கணக்கெடுப்பு மூலம் வெள்ளப் பாதிப்பு மற்றும் போக்குவரத்து நெரிசல் மிகுந்த பகுதிகள் கண்டறியப்படும். மேலும், பஸ் நிறுத்தங்கள் மற்றும் மெட்ரோ நிலையங்களுக்கான இணைப்பை மேம்படுத்தும் வகையிலான அதிநவீன வெள்ள நீர் வடிகால் அமைப்பும், குடிநீர் விநியோகமும் இந்தத் திட்டத்தின் மூலம் உறுதி செய்யப்படவுள்ளது.