இன்றைய டிஜிட்டல் காலகட்டத்தில் கோடிங் அறிவு இல்லாமலேயே, செயற்கை நுண்ணறிவு தொழில்நுட்பத்தைப் பயன்படுத்தி மிக எளிதாக மொபைல் செயலிகள் மற்றும் இணையதளங்களை உருவாக்கும் புதிய வாய்ப்பைத் தமிழக அரசு உருவாக்கியுள்ளது. தமிழ்நாடு அரசின் தொழில் முனைவோர் மேம்பாடு மற்றும் புத்தாக்க நிறுவனம் சார்பில், “செயற்கை நுண்ணறிவைப் பயன்படுத்தி செயலி உருவாக்கம்” என்ற தலைப்பிலான 3 நாள் முழுநேர நேரடிப் பயிற்சி முகாம் சென்னை ஈக்காட்டுத்தாங்கலில் உள்ள அதன் வளாகத்தில் நடைபெறவுள்ளது. வரும் 2026 ஜூலை 15 முதல் ஜூலை 17 வரை (காலை 10:00 மணி முதல் மாலை 5:00 மணி வரை) நடைபெறும் இப்பயிற்சி, சொந்தமாகச் செயலி உருவாக்க வேண்டும் என்ற கனவோடு இருக்கும் பலருக்கும் ஒரு சிறந்த வரப்பிரசாதமாக அமையவுள்ளது.
இந்த அதிநவீனப் பயிற்சியில் பங்கேற்பாளர்கள் தங்களது புதுமையான தொழில் சிந்தனைகளை, முன்னணி AI கருவிகள் மூலம் எப்படி நேரடிச் செயலிகளாக மாற்றுவது என்று தகுதி வாய்ந்த வல்லுநர்கள் மூலம் நேரடியாகக் கற்றுக் கொள்வார்கள். இதில் ChatGPT, Gemini Pro, NotebookLM போன்ற முன்னணி AI தளங்கள் மட்டுமன்றி, ஸ்டார்ட்-அப் நிறுவனங்கள் பயன்படுத்தும் Firebase, Glide, Zapier, Lovable, Replit, Bolt போன்ற No-Code / Low-Code கருவிகளைப் பயன்படுத்தும் முறைகளும் கற்றுத்தரப்படும். மேலும், AI-க்கு துல்லியமாகக் கட்டளையிடும் ‘பிராம்ப்ட் இன்ஜினியரிங்’ (Prompt Engineering) நுட்பங்கள் மற்றும் தாங்கள் உருவாக்கும் செயலிகளின் மாதிரிகளை முதலீட்டாளர்களிடம் சமர்ப்பிக்கும் திறன்களும் இந்த நேரடிச் செயல்முறைப் பயிற்சியில் கற்றுக்கொடுக்கப்படவுள்ளன.
18 வயதிற்கு மேற்பட்ட, குறைந்தபட்சம் 10-ஆம் வகுப்பு தேர்ச்சி பெற்று, கணினியை ஓரளவு இயக்கத் தெரிந்த ஆண், பெண் மற்றும் திருநங்கைகள் என அனைவரும் இப்பயிற்சியில் பங்கேற்கத் தகுதியுடையவர்கள் ஆவர். குறிப்பாக, மாணவர்கள், வேலை தேடுபவர்கள், தொழில்முனைவோர் மற்றும் ஃப்ரீலான்சர்களுக்கு தங்களது திறனை மேம்படுத்தி வருமானம் ஈட்ட இது ஒரு பெரும் வாய்ப்பாகும். வெற்றிகரமாகப் பயிற்சியை முடிப்பவர்களுக்குத் தமிழக அரசின் அதிகாரப்பூர்வ சான்றிதழ் வழங்கப்படுவதோடு, வெளியூர் நபர்களுக்குக் குறைந்த கட்டணத்தில் தங்கும் விடுதி வசதியும் ஏற்பாடு செய்யப்பட்டுள்ளது; இதில் பங்கேற்க இடங்கள் குறைவாகவே உள்ளதால், விருப்பமுள்ளவர்கள் உடனே முன்கூட்டியே பதிவு செய்து இந்த அரிய வாய்ப்பைப் பயன்படுத்திக் கொள்ளலாம்.