சமூக வலைதளங்களில் தற்போது நடிகர் விஜய் மற்றும் நடிகை த்ரிஷா தொடர்பான செய்திகள் காட்டுத்தீயாய் பரவி வருகின்றன. சமீபத்தில் கல்பாத்தி சுரேஷ் மகன் திருமண விழாவில் இருவரும் ஒரே காரில் வந்து இறங்கியதுடன், ஒரே நிறத்தில் ‘மேட்சிங்’ உடைகள் அணிந்து ஜோடியாகக் கலந்து கொண்டது பெரும் பரபரப்பை ஏற்படுத்தியுள்ளது. ஏற்கனவே இவர்கள் இருவரையும் இணைத்து பல்வேறு கிசுகிசுக்கள் வெளிவந்த நிலையில், பொது நிகழ்வில் இவர்கள் இவ்வாறு நெருக்கத்தைக் காட்டியது நெட்டிசன்களிடையே பலத்த விவாதங்களை உருவாக்கியுள்ளது.
சமீபத்தில் ஹைதராபாத்தில் நடைபெற்ற விஜய் தேவரகொண்டா – ராஷ்மிகா திருமண வரவேற்பு நிகழ்ச்சியிலும் இவர்கள் இருவரும் ஒன்றாகக் கலந்து கொண்டனர். அப்போது த்ரிஷா எடுத்த செல்ஃபி புகைப்படம் இணையத்தில் வைரலானது. தொடர்ந்து அடுத்தடுத்த சுப நிகழ்ச்சிகளில் இருவரும் ஜோடியாக வலம் வருவது, வெறும் நட்பு என்பதைத் தாண்டி வேறு ஏதேனும் இருக்குமோ என்ற சந்தேகத்தை சினிமா வட்டாரத்திலும், ரசிகர்களிடையேயும் எழுப்பியுள்ளது.
மறுபுறம், விஜய்யின் மனைவி சங்கீதா கடந்த வாரம் குடும்ப நல நீதிமன்றத்தில் மனுத் தாக்கல் செய்திருந்தது குறிப்பிடத்தக்கது. அதில் தனது கணவருக்கும் ஒரு நடிகைக்கும் இடையே இருக்கும் உறவு குறித்து அவர் வெளிப்படையாகக் குற்றம் சாட்டியிருந்தார். அந்த நடிகையின் பெயரை அவர் குறிப்பிடவில்லை என்றாலும், தற்போதைய நிகழ்வுகள் அனைத்தும் அந்த சர்ச்சையை மீண்டும் கிளறியுள்ளன. இந்த விவகாரத்தில் தனது குழந்தைகளும் மனவேதனை அடைவதாக சங்கீதா தனது மனுவில் குறிப்பிட்டிருந்தது பலரையும் யோசிக்க வைத்துள்ளது.
விஜய் மற்றும் த்ரிஷாவின் இந்தத் தோற்றத்தை சமூக வலைதளங்களில் பலரும் விமர்சித்து வருகின்றனர். குறிப்பாக, ரவி மோகன் – கெனிஷா விவகாரத்தைப் போல இதுவும் ஒரு தவறான முன்னுதாரணமாக மாறிவிடுமோ என்று நெட்டிசன்கள் கேள்வி எழுப்புகின்றனர். குடும்ப உறவுகளில் விரிசல் இருக்கும் சூழலில், பொதுவெளியில் இப்படி மேட்சிங் உடையில் தோன்றுவது சங்கீதா மற்றும் அவரது பிள்ளைகளின் மனநிலையை இன்னும் பாதிக்கும் என்று பலரும் தங்களது கருத்துக்களைப் பகிர்ந்து வருகின்றனர்.