மனைவி கதற கதற ரத்த வெள்ளத்தில் சரிந்த வீரபத்திரன்… நடுரோட்டில் ஓட ஓட விரட்டி வெட்டு…. ஸ்கார்பியோ காரில் வந்த மர்ம கும்பல்… திண்டுக்கல்லில் பழிக்குப்பழி….!

திண்டுக்கல் – நத்தம் நெடுஞ்சாலையில், திமுக பிரமுகர் ‘பாத்ரூம்’ முருகன் கொலை வழக்கில் முதன்மை குற்றவாளியாகச் சேர்க்கப்பட்டிருந்த வீரபத்திரன் (மேட்டுப்பட்டி), நேற்று (அக். 6) பட்டப்பகலில் மர்ம கும்பலால் ஓட ஓட வெட்டிக் கொலை செய்யப்பட்ட சம்பவம் திண்டுக்கல் பகுதியில் பெரும் பரபரப்பையும் அதிர்ச்சியையும் ஏற்படுத்தியுள்ளது. திண்டுக்கல் மாநகராட்சி ஒப்பந்ததாரரும் திமுக பிரமுகருமான ‘பாத்ரூம்’ முருகன், கடந்த 2025-ம் ஆண்டு ஜூலை மாதம் காரில் கடத்தப்பட்டு, ஓடும் காரிலேயே கொடூரமாகக் கொலை செய்யப்பட்டார். மேட்டுப்பட்டி காளியம்மன் கோவில் கணக்கு வழக்குகள் மற்றும் நிர்வகித்தல் தொடர்பான முன்விரோதமே அந்தக் கொலைக்கு முக்கியக் காரணமாகக் கூறப்பட்ட நிலையில், அவ்வழக்கில் கார் ஓட்டுநர் உட்பட 8 பேரை காவல்துறையினர் கைது செய்திருந்தனர்.

சமீபத்தில் நீதிமன்ற ஜாமீனில் வெளியே வந்த வீரபத்திரன், நேற்று காலை தனது மனைவியுடன் இருசக்கர வாகனத்தில் திண்டுக்கல் – நத்தம் சாலையில் சென்று கொண்டிருந்தார். அவர்கள் நொச்சி ஓடைப்பட்டி அருகே வந்தபோது, பயங்கர ஆயுதங்களுடன் திரண்டு வந்த மர்ம கும்பல் ஒன்று அவர்களை வழிமறித்துத் தாக்குதல் நடத்தியது. ஆள் நடமாட்டம் அதிகம் நிறைந்த பகுதியில் நடைபெற்ற இந்தத் தாக்குதலில், வீரபத்திரன் சம்பவ இடத்திலேயே இரத்த வெள்ளத்தில் பரிதாபமாக உயிரிழந்தார். மேலும், இந்தச் சம்பவத்தின் போது வாகனத்திலிருந்து கீழே விழுந்து படுகாயமடைந்த அவரது மனைவி, மீட்கப்பட்டு 108 ஆம்புலன்ஸ் மூலம் திண்டுக்கல் அரசு மருத்துவக் கல்லூரி மருத்துவமனையில் சிகிச்சைக்காகச் சேர்க்கப்பட்டுள்ளார்.

தகவலறிந்து சம்பவ இடத்திற்கு விரைந்த சாணார்பட்டி காவல்துறையினர், வீரபத்திரனின் உடலைக் கைப்பற்றி உடற்கூறாய்வுக்காக அனுப்பி வைத்தனர். இக்கொடூரச் சம்பவம் தொடர்பாக மாவட்ட காவல் கண்காணிப்பாளர் ஜெயக்குமார் அவர்களின் உத்தரவின் பேரில், புறநகர் கூடுதல் காவல் கண்காணிப்பாளர் மஞ்சிமா தலைமையில் சிறப்புத் தனிப்படை அமைக்கப்பட்டுத் தீவிர தேடுதல் வேட்டை முடுக்கி விடப்பட்டுள்ளது. இதற்கிடையே, கொலையாளிகள் தப்பிச் செல்லப் பயன்படுத்தியதாகச் சந்தேகிக்கப்படும் ஸ்கார்பியோ கார் ஒன்றை மீட்ட காவல்துறையினர், அதிலிருந்த பயங்கர ஆயுதங்களையும் பறிமுதல் செய்து தடயங்களைச் சேகரித்து வருகின்றனர்.

இச்சம்பவம் ‘பாத்ரூம்’ முருகன் படுகொலைக்குப் பழிவாங்கும் நோக்கில் திட்டமிட்டு நடத்தப்பட்டதா அல்லது இதில் வேறு ஏதேனும் கோஷ்டி மோதல் பின்னணி உள்ளதா என்ற பல்வேறு கோணங்களில் காவல்துறையினர் தீவிரமாக விசாரணை மேற்கொண்டு வருகின்றனர். மக்கள் நடமாட்டம் மிகுந்த பிரதான நெடுஞ்சாலையில் பட்டப்பகலில் அரங்கேறியுள்ள இந்தச் சடசடப்பான படுகொலை சம்பவம், அப்பகுதி மக்களிடையே பெரும் பீதியையும் சட்டம் ஒழுங்கு குறித்த அச்சத்தையும் ஏற்படுத்தியுள்ளது.