விடுதலைச் சிறுத்தைகள் கட்சியின் (விசிக) தலைவர் தொல். திருமாவளவனுக்குத் தமிழகத் துணை முதல்வர் பதவி வழங்க வேண்டும் என ஓமலூரில் நடைபெற்ற அக்கட்சியின் நிர்வாகிகள் கூட்டத்தில் அதிரடியாகத் தீர்மானம் நிறைவேற்றப்பட்டுள்ளது. அத்துடன், திருச்சி கிழக்குத் தொகுதி இடைத்தேர்தலில் அவர் போட்டியிட வேண்டும் எனவும் விசிகவினர் தங்களின் விருப்பத்தைத் தெரிவித்துள்ளனர்.
அண்மையில், “நான் இடைத்தேர்தலில் போட்டியிடப் போவதில்லை” என்று திருமாவளவன் திட்டவட்டமாக விளக்கம் அளித்திருந்த நிலையிலும், தொண்டர்களின் இந்தத் தொடர் கோரிக்கைகளும் தீர்மானங்களும் தவெக அரசுக்கு ஒருவித அரசியல் நெருக்கடியைக் கொடுக்கும் வகையில் அமைந்துள்ளதாக அரசியல் விமர்சகர்கள் கருதுகின்றனர். இந்த விவகாரம் தற்போது தமிழக அரசியல் களத்தில் பெரும் விவாதத்தைக் கிளப்பியுள்ளது.