ஐயப்பனை பார்க்க பாதயாத்திரை சென்ற பக்தர்கள்… நடுவழியிலேயே காத்திருந்த எமன்… அதிகாலையில் நடந்த துயர சம்பவம்…!

தேனி மாவட்டம் ஆண்டிப்பட்டி மேல தெருவை சேர்ந்த ஐயப்ப பக்தர்கள் ஒவ்வொரு வருடமும் அதே பகுதியை சேர்ந்த மாரிச்சாமி என்ற குருசாமி தலைமையில் சபரிமலைக்கு பாதயாத்திரை செல்வதை வழக்கமாகக் கொண்டுள்ளனர். அதன்படி மாரி சாமி (55) தலைமையில் ராம்கி (35) மற்றும் ஏழு பேருடன் ஆண்டிப்பட்டியிலிருந்து நேற்று இரவு பாதயாத்திரையாக சபரிமலைக்கு புறப்பட்டனர். இன்று அதிகாலை அவர்கள் சின்னமனூர் அருகில் உள்ள பகுதியில் வந்து கொண்டிருந்த போது திண்டுக்கல் மாவட்டம் வேடசந்தூர் தாலுகா மேலப்பாடியூர் பகுதியை சேர்ந்த சேர்ந்த சிவக்குமார் (34) என்பவர் வேனில் ஐயப்ப பக்தர்களுடன் சபரிமலைக்கு சென்று கொண்டிருந்தார்.

அதிகாலை சுமார் 4.30 மணி அளவில் மற்றவர்கள் முன்னே சென்றுவிட மாரிச்சாமி மற்றும் ராம்கி மட்டும் பின்னால் வந்து கொண்டிருந்தனர். அவர்கள் மீது அந்த வேன் பயங்கரமாக மோதி விபத்துக்குள்ளானது. இதில் மாரிச்சாமி மற்றும் ராம்கி சம்பவ இடத்திலேயே பரிதாபமாக உயிரிழந்தனர். இதனைப் பார்த்ததும் அந்த பகுதியை சேர்ந்த பொதுமக்கள் போலீசுக்கு தகவல் தெரிவித்தனர். சம்பவ இடத்திற்கு வந்த போலீசார் இருவரின் உடல்களை மீட்டு பிரேத பரிசோதனைக்கு அனுப்பி வைத்தனர். இது குறித்து வழக்கு பதிவு செய்துள்ள போலீசார் விசாரணை நடத்தி வரும் நிலையில் இந்த சம்பவம் பெறும் சோகத்தை ஏற்படுத்தி உள்ளது.