செங்கோட்டையன் விலகலால் அதிமுக-வுக்கு பாதிப்பா…? கோபியில் இபிஎஸ் கொடுத்த மாஸ் பதிலடி…!!

ஈரோடு மாவட்டம் கோபிசெட்டிபாளையத்தில் தேர்தல் பிரச்சாரம் மேற்கொண்ட அதிமுக பொதுச்செயலாளர் எடப்பாடி பழனிசாமி, அக்கட்சியிலிருந்து விலகிச் சென்ற முன்னாள் அமைச்சர் செங்கோட்டையனை மிகக்கடுமையாகச் சாடினார். நீண்ட காலம் அதிமுகவில் இருந்து அனைத்து சலுகைகளையும் அனுபவித்துவிட்டு, இப்போது கட்சிக்குத் துரோகம் இழைத்துள்ளதாக அவர் குற்றம் சாட்டினார். செங்கோட்டையன் போன்றவர்களின் சுயநலப் போக்கை மக்கள் உணர்ந்துள்ளதாகக் குறிப்பிட்ட இபிஎஸ், அதிமுகவின் கோட்டையான கொங்கு மண்டலத்தில் துரோகிகளுக்கு இடமில்லை என ஆவேசமாக முழங்கினார்.

செங்கோட்டையனின் அரசியல் வாழ்க்கைக்குப் முகவரி கொடுத்ததே அதிமுகதான் என்பதைச் சுட்டிக்காட்டிய அவர், அதிகாரத்திற்காகக் கட்சி மாறியுள்ள அவரது செயலை மக்கள் மன்னிக்க மாட்டார்கள் எனத் தெரிவித்தார். மேலும், அதிமுகவின் பலம் தொண்டர்களிடம் தான் உள்ளதே தவிர, விலகிச் சென்ற சில தலைவர்களிடம் இல்லை என்றும் அவர் திட்டவட்டமாகக் கூறினார். வரும் தேர்தலில் துரோகத்தை வீழ்த்தி அதிமுக மகத்தான வெற்றி பெறும் எனத் தெரிவித்த எடப்பாடி பழனிசாமி, தொண்டர்கள் அனைவரும் ஒற்றுமையுடன் களப்பணியாற்ற வேண்டும் என வேண்டுகோள் விடுத்தார்.