நெல்லை பாளையங்கோட்டையில் நடைபெற்ற மதிமுக நிர்வாகி இல்லத் திருமண விழாவில் பங்கேற்ற அக்கட்சியின் பொதுச்செயலாளர் வைகோ, செய்தியாளர்களிடம் பேசுகையில் தற்போதைய தமிழக அரசு மற்றும் எதிர்க்கட்சிகளின் செயல்பாடுகள் குறித்துப் பல்வேறு கருத்துகளைத் தெரிவித்துள்ளார். லஞ்சம் வாங்கிப் பழக்கப்பட்ட அதிகாரிகளுக்கு தற்போதைய ஆட்சியில் பணம் நின்றுவிட்டதாகவும், அதனால் இந்த அரசை ஒழிக்க வேண்டும் என்ற நோக்கில் அதிகார வர்க்கம் செயல்பட்டு வருவதாகவும் அவர் குற்றம் சாட்டியுள்ளார். மேலும், இந்த ஆட்சி ஆறு மாதங்கள் மட்டுமே நீடிக்கும் என முன்னாள் முதலமைச்சர் ஒருவர் கூறி வருவதைச் சுட்டிக்காட்டிய வைகோ, அதனையும் மீறித் தேர்தல் நடைபெற்றால் முதலமைச்சர் விஜய் தலைமையிலான அணி கூடுதலாக 30 இடங்களில் வெற்றி பெறும் என்றும், அவருக்கு ஆதரவாகத் தாம் தெருத் தெருவாகப் பிரச்சாரம் செய்யப் போவதாகவும் தெரிவித்துள்ளார்.
முன்னாள் ஆட்சியாளர்களின் செயல்பாடுகள் மற்றும் ஆடம்பரங்கள் குறித்தும் வைகோ தனது பேட்டியில் விமர்சனங்களை முன்வைத்துள்ளார். முன்னாள் முதலமைச்சர் ஜெயலலிதா காலத்தில் வளர்ப்பு மகன் திருமணத்தில் அணியப்பட்ட ஆபரணங்கள் குறித்துப் பேசப்பட்ட நிலையில், தற்போது முன்னாள் முதலமைச்சர் மு.க. ஸ்டாலின் மற்றும் நடிகர் ரஜினிகாந்த் குடும்பத்தினர் கிரேக்க நாட்டில் ஆடம்பரமாகத் திருமணம் நடத்தியது குறித்து யாரும் விமர்சனம் செய்ய முன்வரவில்லை என அவர் கேள்வி எழுப்பியுள்ளார். 1991 முதல் 2006 வரையிலான காலகட்டத்திலும், அதன் பிறகு ஜெயலலிதா, கருணாநிதி, ஓ.பன்னீர்செல்வம், மு.க. ஸ்டாலின் மற்றும் எடப்பாடி பழனிசாமி ஆகியோரது ஆட்சிகளிலும் நடைபெற்ற பல்வேறு முறைகேடுகள் குறித்த புள்ளிவிவர அறிக்கை அனைவருக்கும் வழங்கப்பட்டுள்ளதாகவும், தவறைத் தவறு என்று சுட்டிக்காட்டத் தாம் எப்போதும் தயங்குவதில்லை என்றும் அவர் குறிப்பிட்டுள்ளார்.
தூத்துக்குடி துப்பாக்கிச் சூடு சம்பவம் மற்றும் ஸ்டெர்லைட் விவகாரம் குறித்துப் பேசிய வைகோ, முன்னாள் முதலமைச்சர் எடப்பாடி பழனிசாமியைக் கடுமையாக விமர்சித்துள்ளார். அருணா ஜெகதீசன் ஆணையத்தின் அறிக்கையின் அடிப்படையில், பாதிக்கப்பட்டவர்களுக்கு முதலமைச்சர் விஜய் மூலம் கூடுதல் நிவாரணம் வழங்கப்பட உள்ளதாக அவர் தெரிவித்துள்ளார். மேலும், ஸ்டெர்லைட் அதிபர் அனில் அகர்வால் கோடிகளைக் கொட்டி முதலமைச்சர் விஜய்யைச் சந்திக்க முயன்றதாகவும், ஆனால் அவரைச் சந்திக்கக் கூடாது எனத் தாம் கேட்டுக்கொண்டதை ஏற்று முதலமைச்சர் விஜய் அந்தச் சந்திப்பைத் தவிர்த்துவிட்டதாகவும் வைகோ பாராட்டுத் தெரிவித்துள்ளார்.
திமுக மற்றும் அதன் கூட்டணிக் கட்சிகளின் விமர்சனங்களுக்குப் பதிலளித்த வைகோ, தற்போதைய தமிழக வெற்றிக் கழக அரசை விமர்சிக்காவிட்டால் விசிக மற்றும் காங்கிரஸ் தலைவர்களுக்குச் சாப்பாடு இறங்காது எனக் கூறியுள்ளார். திமுக தரப்பிலிருந்து எத்தனை பொய்ப் பிரச்சாரங்கள் செய்யப்பட்டாலும் அவற்றை முறியடிக்க மதிமுக துணை நிற்கும் என்றும், இனி ஒருபோதும் திமுக ஆட்சிக்கு வர முடியாது என்றும் அவர் திட்டவட்டமாகத் தெரிவித்துள்ளார். கோவில்களில் பக்தர்கள் ‘அரோகரா’ முழக்கமிடுவதில் எந்தத் தவறும் இல்லை என்றும், திமுக ஆட்சியில் கோவில்களில் நடக்காத நிகழ்வுகளா இப்போது நடந்துவிட்டன என்றும் அவர் கேள்வி எழுப்பியுள்ளார்.
முன்னதாக, பாளையங்கோட்டையில் நடைபெற்ற மதிமுக ஒழுங்கு நடவடிக்கைக் குழு உறுப்பினர் கள்ளத்தியான் மகன் பட்டாபிராம் – நித்யஸ்ரீ ஆகியோரின் திருமணத்தை வைகோ முன்னின்று நடத்தி வைத்தார். இந்த விழாவில் பாஜக மாநிலத் தலைவர் நயினார் நாகேந்திரன், திருநெல்வேலி நாடாளுமன்ற உறுப்பினரும் காங்கிரஸ் மாநிலத் துணைத் தலைவருமான ராபர்ட் புரூஸ் உள்ளிட்ட பல்வேறு அரசியல் கட்சிகளைச் சேர்ந்த முக்கியத் தலைவர்களும் கலந்துகொண்டு மணமக்களை வாழ்த்தினர்.
