திமுக கூட்டணியில் இருந்து மதிமுக அதிகாரப்பூர்வமாக வெளியேறியுள்ள சூழலில், தவெக தலைவர் முதல்வர் விஜய்யிடம் மதிமுக பொதுச்செயலாளர் வைகோ மற்றும் அவரது குடும்பத்தினர் ரூ. 50 கோடி பெற்றதாக எழுந்துள்ள அவதூறுகளுக்கு வைகோ இன்று கடுமையான மறுப்பையும் விளக்கத்தையும் அளித்துள்ளார். சென்னையில் நடைபெற்ற மதிமுகவின் 32-ஆவது பொதுக்குழு கூட்டத்திற்குப் பிறகு செய்தியாளர்களைச் சந்தித்த அவர், தன் மீதும், திருச்சி எம்பி துரை வைகோ உள்ளிட்ட தனது குடும்பத்தினர் மீதும் திமுகவினர் அபாண்டமாகப் பழி சுமத்தி வருவதாகக் கூறி மிகுந்த வேதனை தெரிவித்தார்.
32 ஆண்டுகால அரசியல் வாழ்க்கையில் ஐந்தரை ஆண்டுகள் சிறையில் இருந்திருப்பதாகக் குறிப்பிட்ட வைகோ, கட்சியை நடத்துவதற்காக தனது 103 ஆண்டுகள் பழமையான பூர்விகச் சொத்துக்களையும், சங்கரன்கோவிலில் இருக்கும் தனது வீட்டையும் விற்றுள்ளதாகக் கூறினார். இன்றைய மதிப்புக்கு ரூ. 30 முதல் 40 கோடி வரை விலைபோகக்கூடிய இரண்டே கால் ஏக்கர் நிலத்தைக் கட்சிக்காக இழந்தவன் நான் எனக் குறிப்பிட்ட அவர், தவெக-விடம் பணம் வாங்கியதாகப் பொய் பரப்புபவர்கள் மீது நீதிமன்றத்தில் மான நஷ்ட வழக்கு தொடர உள்ளதாக ஆவேசமாகத் தெரிவித்தார்.
திமுகவுடன் இனி தோழமையில் இருப்பது சாத்தியமில்லை என்பதால், அக்கூட்டணியில் இருந்து விலகும் தீர்மானம் பொதுக்குழுவில் ஒருமனதாக நிறைவேற்றப்பட்டுள்ளதாக வைகோ அறிவித்தார். மேலும், வரவிருக்கும் சட்டமன்ற இடைத்தேர்தலில் தமிழக வெற்றிக் கழகத்தை (தவெக) மதிமுக முழுமையாக ஆதரிக்கும் என்றும், அடுத்து வரவிருக்கும் உள்ளாட்சித் தேர்தல்களிலும் தவெக-உடன் முறையான அரசியல் தோழமை ஏற்படும் வகையில் அடுத்தகட்ட நடவடிக்கைகள் அமையும் என்றும் அவர் திட்டவட்டமாகப் பிரகடனம் செய்தார்.