ஷங்கர் படத்துல பாட்டு நல்லா வருதுன்னா அதுக்குக் காரணம் இதுதான்… வாலி பகிர்ந்த சுவாரஸ்ய தகவல்!

தமிழ் சினிமாவில் 50 ஆண்டுகளுக்கும் மேலாக தன்னுடைய பாடல் வரிகளால் கோலோச்சியவர் கவிஞர் வாலி. அவரின் ஆரம்ப காலத்தில் கண்ணதாசனோடும், 80 மற்றும் 90 களில்  வைரமுத்துவோடும். 2000களில் முத்துகுமார் உள்ளிட்ட இளம் கவிஞர்களோடும் போட்டி போட்டார். ஆனால் அவர் அனைவரிடமும் நட்பாகப் பழகினார். இதனால் அவரை ரசிகர்கள் வாலிபக் கவிஞர் என்றே அழைத்தனர்.

திரையுலகில் வாலிக்கு மிகவும் நெருக்கமான நண்பர்களில் ஒருவர் நடிகர் எம் ஜி ஆர். தன்னுடைய படங்களுக்கு முதலில் கண்ணதாசனையே தொடர்ந்து பாடல்கள் எழுத வைத்து வந்தார் எம் ஜி ஆர். ஆனால் இருவருக்கும் இடையே அரசியல் ரீதியாக ஒரு பிரிவு வந்தது. எம் ஜி ஆர் தீவிரமாக திமுகவில் இயங்கி வந்த நிலையில், கண்ணதாசன் திமுகவில் இருந்து காங்கிரஸுக்கு தாவினார். அதன் பின்னர் கண்ணதாசன் எம் ஜி ஆரைக் கடுமையாக விமர்சனம் செய்ய ஆரம்பித்தார். அப்போதுதான் எம் ஜி ஆர் வாலியை தன்னுடைய ஆஸ்தான கவியாக மாற்றிக் கொண்டார். அதன் பின்னர் பல நடிகர்களுக்கு எழுதிய வாலி, கடைசியாக சிவகார்த்திகேயன் வரைக்கும் பாடல்கள் எழுதியுள்ளார்.

வாலி எழுதினார் என்றால் அந்த பாடல் கமர்ஷியல் ஹிட் என்பது எழுதப்படாத விதியாக இருந்தது. அதனால்தான் முன்னணி இயக்குனர்கள் மற்றும் நடிகர்கள் தங்கள் படங்களில் வாலி, ஒரு பாடலாவது எழுத வேண்டும் என ஆசைப்படுவார்கள். அப்படிதான் இயக்குனர் ஷங்கர், தொடர்ந்து தன்னுடைய படங்களில் வாலியை தொடர்ந்து பாடல்கள் எழுத வைத்தார்.

ஷங்கருடனான கூட்டணி குறித்து பேசியுள்ள வாலி, “ஷங்கர் படத்தில் ஏன் பாடல்கள் நன்றாக வருகிறது என்றால், அவர் நல்ல வரிகள் வருவதற்காகக் காத்திருப்பார். என்னைப் போட்டு டார்ச்சர் செய்யமாட்டார். இந்தியன் படத்தில் மாயா மச்சிந்திரா பாடலுக்கு செட் எல்லாம் போட்டு ஷூட்டிங் போக தயாராக இருந்தார்கள். ஆனால் இன்னும் வார்த்தை வந்துவிழவில்லை.

அவர் என்னை அவசரப்படுத்தவில்லை. 3 நாட்கள் ஷூட்டிங்கை தள்ளிவைத்துவிட்டு காத்திருந்தார். அதன் பிறகுதான் எனக்கு மாயா மச்சிந்திரா என்ற வார்த்தைகள் கிடைத்தன. அந்த பாடலை வித்தியாசமாகப் படமாக்கி பெரியளவில் ஹிட்டாக்கினார்” எனக் கூறியுள்ளார்.