நள்ளிரவில் நடுங்கிய வளைகுடா…. ஈரான் மீது டிரம்ப் சொன்னபடியே நடந்த திடீர் தாக்குதல்… 2 நாள் கெடுவில் நடந்த அந்த நள்ளிரவு பயங்கரம்….!

வளைகுடா பகுதியில் கடந்த சில வாரங்களாக நிலவி வந்த தற்காலிக அமைதி, இரவோடு இரவாகக் கலைந்து மீண்டும் பதற்றம் தொற்றிக்கொண்டுள்ளது. அமெரிக்கா மற்றும் ஈரான் இடையே எட்டப்பட்ட இடைக்கால போர் நிறுத்த ஒப்பந்தம் முறிந்ததைத் தொடர்ந்து, இரு நாடுகளும் மாறி மாறி போர்க்குற்றச்சாட்டுகளை முன்வைக்கத் தொடங்கின. இந்தச் சூழலில், தெற்கு ஈரானில் உள்ள முக்கிய உள்கட்டமைப்பு வசதிகளைக் குறிவைத்து அமெரிக்கா நள்ளிரவில் திடீர் ஏவுகணைத் தாக்குதல்களை நடத்தியுள்ளது. ஈரானின் ராணுவத் திறன்களைப் பலவீனப்படுத்தும் நோக்கில் இந்த நடவடிக்கை எடுக்கப்பட்டுள்ளதாக அமெரிக்க சென்டர் கமாண்ட் (CENTCOM) அதிகாரப்பூர்வமாக உறுதிப்படுத்தியுள்ளது.

இந்தக் கடுமையான தாக்குதலில் தென்கிழக்கு ஈரானில் உள்ள இரான்ஷஹர் விமான நிலைய வளாகம் பலத்த சேதமடைந்துள்ளது. மேலும், முக்கிய துறைமுக நகரமான பந்தர் அப்பாஸ் ரயில் நிலையமும் ஏவுகணை வீச்சுக்கு உள்ளானதில் ஊழியர்கள் இருவர் காயமடைந்தனர். ஹோர்மோஸ்கான் மாகாணத்தில் உள்ள இரண்டு முக்கிய பாலங்கள் தகர்க்கப்பட்டதில் இதுவரை 2 பேர் உயிரிழந்துள்ளதாகவும், 4 பேர் காயமடைந்துள்ளதாகவும் உள்ளூர் ஊடகங்கள் தெரிவித்துள்ளன. பாலங்கள் சேதமடைந்ததால் பந்தர் அப்பாஸ், காமிர் மற்றும் லார் நகரங்களை இணைக்கும் முக்கிய சாலைகள் தற்காலிகமாக மூடப்பட்டு, போக்குவரத்து முற்றிலும் முடங்கியுள்ளது.

முன்னதாக, “ஈரான் பேச்சுவார்த்தைக்குத் திரும்பத் தவறினால் அதன் மின்நிலையங்களும் பாலங்களும் தகர்க்கப்படும்; அடுத்த வாரம் ஈரான் சந்திக்கப்போகும் மிக மோசமான வாரமாக இருக்கும்” என்று அமெரிக்க அதிபர் டொனால்டு டிரம்ப் விடுத்த எச்சரிக்கையின் தொடர்ச்சியாகவே இந்தத் தாக்குதல் பார்க்கப்படுகிறது. அமெரிக்காவின் இந்த அதிரடி ராணுவ நடவடிக்கையை அடுத்து ஒட்டுமொத்த வளைகுடா நாடுகளும் கடுமையான எச்சரிக்கை நிலைக்குச் சென்றுள்ளன. குறிப்பாக, குவைத் நாடு தனது வான்வெளியில் 32 அநாமதேய ட்ரோன்கள் கண்டறியப்பட்டுள்ளதாகப் பரபரப்புக் குற்றச்சாட்டை எழுப்பியுள்ளது.

அதேபோல், ஈராக் நாட்டின் எர்பில் நகருக்கு அருகே ட்ரோன் தாக்குதல்கள் நடத்தப்பட்டதாகத் தகவல்கள் வெளியானதைத் தொடர்ந்து, பாக்தாத்தில் உள்ள அமெரிக்க தூதரகம் தங்களது நாட்டு குடிமக்களை மிகுந்த எச்சரிக்கையுடன் இருக்குமாறு அறிவுறுத்தியுள்ளது. இந்தத் தொடர் மோதல் போக்கு மத்திய கிழக்கின் ஒட்டுமொத்த பாதுகாப்பிற்கும் பெரும் அச்சுறுத்தலாக மாறியுள்ளது. தற்போதைய பதற்றமான சூழல் நீடித்தால், உலகளாவிய வர்த்தகத்தின் முக்கியப் பாதையான ஹார்முஸ் ஜலசந்தியில் சரக்குக் கப்பல் போக்குவரத்து கடுமையாகப் பாதிக்கப்பட்டு, சர்வதேசப் பொருளாதாரத்தில் பெரும் தாக்கத்தை ஏற்படுத்தும் என்று அஞ்சப்படுகிறது.