ஈரானுடனான அமைதிப் பேச்சுவார்த்தைகள் தோல்வியடைந்ததைத் தொடர்ந்து, அந்நாட்டின் மீதான அழுத்தத்தை அதிகரிக்கும் நோக்கில் அமெரிக்கா தனது கடற்படை பலத்தை அரபிக்கடலில் நிலைநிறுத்தியுள்ளது. குறிப்பாக, அமெரிக்காவின் USS Rushmore (LSD 47) என்ற அதிநவீன போர்க்கப்பல் ஈரானின் துறைமுகங்களை முற்றுகையிடும் பணிகளில் தீவிரமாக ஈடுபட்டுள்ளது. உணவு மற்றும் மருத்துவப் பொருட்களைத் தவிர, மற்ற அனைத்து வணிகப் பரிமாற்றங்களையும் தடுப்பதே இந்த முற்றுகையின் முதன்மை நோக்கமாகும். USS Rushmore கப்பலானது தரை மற்றும் கடல் என இருதளங்களிலும் செயல்படக்கூடிய வீரர்களையும், சிறிய ரகப் படகுகளையும் சுமந்து செல்லும் திறன் கொண்டது என்பது குறிப்பிடத்தக்கது.
இந்த பிரம்மாண்ட முற்றுகை நடவடிக்கைக்கு அமெரிக்காவின் யுஎஸ்எஸ் ஆபிரகாம் லிங்கன் (USS Abraham Lincoln) போர்க்கப்பல் தலைமை தாங்குகிறது. இதனுடன் 11-க்கும் மேற்பட்ட தாக்குதல் கப்பல்கள் அரபிக்கடல் மற்றும் ஓமன் வளைகுடா பகுதிகளில் தொடர் ரோந்துப் பணியில் ஈடுபடுத்தப்பட்டுள்ளன. அமெரிக்காவின் இந்த நடவடிக்கைக்குப் பதிலடி கொடுக்கும் விதமாக, உலக வர்த்தகத்தின் முக்கிய வழித்தடமான ஹார்முஸ் நீரிணையை (Strait of Hormuz) மூடிவிடப்போவதாக ஈரான் எச்சரித்துள்ளது. இதனால் உலகளாவிய எண்ணெய் மற்றும் எரிவாயு விநியோகம் முற்றிலுமாக முடங்கும் அபாயம் ஏற்பட்டுள்ளது, இது சர்வதேச சந்தையில் பெரும் பதற்றத்தை உருவாக்கியுள்ளது.
இந்த மோதல் போக்கு இந்தியப் பொருளாதாரத்தில் நேரடி பாதிப்புகளை ஏற்படுத்தும் என அஞ்சப்படுகிறது. இந்தியா தனது கச்சா எண்ணெய் தேவையில் சுமார் 85% இறக்குமதி மூலமே பூர்த்தி செய்கிறது; இதில் 60% எண்ணெய் விநியோகம் ஹார்முஸ் நீரிணை வழியாகவே நடைபெறுகிறது. தற்போதைய முற்றுகை மற்றும் பதற்றம் நீடித்தால், சர்வதேச சந்தையில் கச்சா எண்ணெய் விலை ஒரு பீப்பாய்க்கு $100-க்கும் மேல் உயரக்கூடும். இது இந்தியாவின் இறக்குமதிச் செலவை அதிகரிப்பதோடு, நாட்டின் அந்நியச் செலாவணி கையிருப்பிலும் அழுத்தத்தை ஏற்படுத்தும்.
உள்நாட்டுச் சந்தையைப் பொறுத்தவரை, கச்சா எண்ணெய் விலை உயர்வு பெட்ரோல், டீசல் மற்றும் சமையல் எரிவாயு விலைகளில் பெரும் தாக்கத்தை ஏற்படுத்தும். ஏற்கனவே நயாரா மற்றும் ஷெல் போன்ற தனியார் நிறுவனங்கள் விலையை உயர்த்தத் தொடங்கியுள்ள நிலையில், நிலைமை சீராகாவிட்டால் பொதுத்துறை நிறுவனங்களும் விலையை உயர்த்த வேண்டிய கட்டாயத்திற்குத் தள்ளப்படும். இது அத்தியாவசியப் பொருட்களின் விலையேற்றத்திற்கு வழிவகுப்பதோடு, நாட்டின் ஒட்டுமொத்த பணவீக்கத்தையும் அதிகரிக்கக்கூடும் என்பதால், மத்திய அரசு இந்த விவகாரத்தை உன்னிப்பாகக் கவனித்து வருகிறது.