“டீம் A vs டீம் B”…. ஈரானை நம்பி ஏமாறாதீங்க…. டிரம்ப் டீமிற்குள்ளேயே இப்படி ஒரு சண்டையா?… அமெரிக்க அரசியல் பரபரப்பு…!

அமெரிக்க அதிபர் டொனால்ட் டிரம்ப், ஈரானுடன் பல மாதங்களாக நீடித்து வந்த மோதலை முடிவுக்குக் கொண்டு வர தீவிரமாக முயன்று வருகிறார். அதன் முதற்கட்டமாக இரு நாடுகளுக்கும் இடையே தற்போது 60 நாட்களுக்கான இடைக்கால போர் நிறுத்த ஒப்பந்தம் கையெழுத்தாகியுள்ளது. இதனைத் தொடர்ந்து, ஈரானின் அணுசக்தித் திட்டம் குறித்த இறுதி ஒப்பந்தத்திற்கான பேச்சுவார்த்தையைத் தொடங்க டிரம்ப் திட்டமிட்டுள்ளார். உலக நாடுகள் பலவும் இந்த அமைதி முயற்சியை வரவேற்றாலும், டிரம்பிற்கு வெளியிலிருந்து வரும் ஆதரவை விட, அவரது சொந்த நிர்வாகத்திற்குள் இருந்தே கடுமையான எதிர்ப்புகள் கிளம்பியுள்ளதுதான் இப்போது சர்வதேச அளவில் பெரும் விவாதப் பொருளாக மாறியுள்ளது.

டிரம்பின் குழுவிற்குள்ளேயே இந்த விவகாரத்தில் ‘டீம் ஏ’, ‘டீம் பி’ என இரண்டு பிரிவுகள் உருவாகியுள்ளன. துணை அதிபர் ஜே.டி. வான்ஸ், தூதர் ஸ்டீவ் விட்காஃப் மற்றும் ஆலோசகர் ஜாரெட் குஷ்னர் ஆகியோர் அடங்கிய ‘டீம் ஏ’ பிரிவினர், ஈரானுடன் ராஜதந்திர ரீதியாகப் பேசி தீர்வு காண்பதையே ஆதரிக்கின்றனர். நீண்டகாலப் போர் மற்றும் பொருளாதார நெருக்கடிக்கு முற்றுப்புள்ளி வைக்கவும், சர்வதேச எண்ணெய் சந்தையை நிலைப்படுத்தவும் இப்பேச்சுவார்த்தை உதவும் என்பது இவர்களின் வாதம். மேலும், இந்த 60 நாள் அவகாசத்தைப் பயன்படுத்தி மத்திய கிழக்கில் மற்றொரு பெரிய போர் ஏற்படுவதைத் தவிர்த்து, ஈரானின் அணுசக்தி நடவடிக்கைகளைக் கட்டுப்படுத்தலாம் என்று இவர்கள் நம்புகிறார்கள்.

மறுபுறம், சிஐஏ (CIA) இயக்குநர் ஜான் ராட்க்ளிஃப், வெளியுறவுத்துறை அமைச்சர் மார்கோ ரூபியோ மற்றும் பாதுகாப்புத்துறை அமைச்சர் பீட் ஹெக்செத் ஆகியோர் அடங்கிய ‘டீம் பி’ பிரிவினர் இந்த ஒப்பந்தத்தைக் கடுமையாக எதிர்க்கின்றனர். ஈரானை நம்புவது ஆபத்தானது என்றும், பேச்சுவார்த்தை என்ற பெயரில் அந்நாடு காலத்தைக் கடத்த முயல்கிறது என்றும் இவர்கள் எச்சரிக்கின்றனர். குறிப்பாக, அமெரிக்காவின் உளவுத்துறைத் தலைவரான ஜான் ராட்க்ளிஃப், ஈரான் தனது அணுசக்தி செறிவூட்டல் பணிகளை உண்மையிலேயே நிறுத்தும் என்பதில் தனக்குத் துளியும் நம்பிக்கை இல்லை என வெளிப்படையாகக் கூறியுள்ளார். அணு ஆயுதக் கொள்கையில் ஈரான் மாற்றம் செய்யும் முன்பே, அமெரிக்கா அதன் மீதான பொருளாதாரத் தடைகளைத் தளர்த்துவது தவறு என்பது இவர்களின் முக்கிய வாதமாகும்.

இந்தச் சூழல் அதிபர் டிரம்ப்பிற்கு ஒரு பெரிய தர்மசங்கடத்தை ஏற்படுத்தியுள்ளது. ஏனெனில், முன்பு ஒபாமா ஆட்சிக் காலத்தில் ஈரானுடன் போடப்பட்ட அணுசக்தி ஒப்பந்தத்தை “மிகவும் பலவீனமானது” என்று டிரம்ப் கடுமையாக விமர்சித்திருந்தார். ஆனால், இப்போது அவரே ஈரானுடன் பேச்சுவார்த்தை நடத்த வேண்டிய நிலைக்குத் தள்ளப்பட்டுள்ளார். தற்போது எட்டப்பட்டுள்ள 60 நாள் இடைக்கால ஒப்பந்தம் வெற்றி பெற்றால், ஒரு பெரிய போரைத் தடுத்த பெருமை டிரம்பிற்குச் சேரும். ஒருவேளை உளவுத்துறையின் எச்சரிக்கையை மீறி நடத்தப்படும் இப்பேச்சுவார்த்தை தோல்வியடைந்தால், அவரது சொந்த அதிகாரிகளே அவருக்கு எதிராகத் திரும்பும் இக்கட்டான சூழல் உருவாகும்.