முதலவர் விஜய் அறையில் சிடிஆர் நிர்மல்குமார் அவசர மீட்டிங்… கோட்டையில் நடந்த ரகசிய நகர்வு… தலைமைச் செயலகத்தில் திடீர் அதிரடி…!!!

தமிழ்நாடு முழுவதும் நிலவும் கடுமையான மின் தடை மற்றும் மின் வெட்டுப் பிரச்சினைகளுக்கு மத்தியில், புதிய மின்சாரத் துறை அமைச்சர் சி.டி.ஆர். நிர்மல்குமார் தலைமையில் முக்கிய ஆலோசனைக் கூட்டம் நடைபெறுகிறது. வருமானத்தை விடச் செலவு அதிகமாக இருப்பதால் மின்சாரத் துறை ஆண்டுதோறும் கடனில் மூழ்கி வரும் சூழலில், தவெக அரசின் ‘200 யூனிட் இலவச மின்சாரம்’ திட்டத்தை நடைமுறைப்படுத்துவது புதிய அமைச்சரின் முதல் பெரும் சவாலாக உருவெடுத்துள்ளது. இன்றைய கூட்டத்தில் மின் விநியோகம், உற்பத்தி, பசுமை எரிசக்தி துறை அதிகாரிகள் பங்கேற்று, துறையின் மொத்தக் கடன், தற்போதைய செலவினங்கள் மற்றும் அரசிடம் எதிர்பார்க்கப்படும் மானிய உதவி குறித்த விரிவான அறிக்கைகளைச் சமர்ப்பிக்க உள்ளனர்.

இதற்கிடையே செய்தியாளர்களைச் சந்தித்த அமைச்சர் நிர்மல்குமார், பொதுமக்கள் மற்றும் எதிர்க்கட்சிகள் இதுவரை கண்டிராத வகையில் வேகமான, சுறுசுறுப்பான ஆட்சியைத் தமிழ்நாட்டு மக்கள் காணப்போகிறார்கள் என்று உறுதியளித்துள்ளார். இன்னும் ஓராண்டுக்குள் புதிய அரசுத்துறையும், புதிய பணிமுறையும் உருவாகும் என்றும், அர்ப்பணிப்புடன் செயல்படும் அமைச்சர்களையும், முழுநேர மக்கள் பணியில் ஈடுபடும் முதலமைச்சரையும் மக்கள் நேரடியாகக் காண்பார்கள் என்றும் அவர் அடித்துக் கூறியுள்ளார். எனினும், தமிழ்நாடு மின்சார விநியோகக் கழகம் (TNPDCL) மட்டும் தற்போது ₹1.98 லட்சம் கோடிக்கும் அதிகமான நீண்டகால மற்றும் குறுகியகாலக் கடன்களைச் சுமந்து கொண்டு, வட்டி செலுத்துவதற்கே திணறும் நிலையில் இயங்கி வருவது குறிப்பிடத்தக்கது.

மேலும், தனியார் நிறுவனங்களிடமிருந்து அதிக விலைக்கு மின்சாரம் கொள்முதல் செய்யப்படுவதால், நடப்பு 2025-26 நிதியாண்டில் மின் வாரியத்தின் கடன் அளவு 6 முதல் 10 சதவீதம் வரை அதிகரிக்கும் என்று அதிகாரிகள் மதிப்பிட்டுள்ளனர். கோடைகாலம், உச்சப் பயன்பாட்டு நேரங்கள் மற்றும் வளர்ந்து வரும் தொழில்துறையின் மின் தேவையைச் சமாளிக்கத் தனியார் நிறுவனங்களை நம்பியிருக்க வேண்டியுள்ளதால், மின் வாரியத்தின் நிதி நெருக்கடி நாளுக்கு நாள் அதிகரித்து வருகிறது. இந்த நிதிச் சுமையைச் சீரமைப்பது குறித்தும், மின்சார உள்கட்டமைப்பு திட்டங்களின் தற்போதைய நிலை குறித்தும் இன்றைய கூட்டத்தில் விரிவான ஆய்வுகள் மேற்கொள்ளப்படவுள்ளன.

மற்றொரு முக்கிய அம்சமாக, வரும் ஜூலை 1-ம் தேதி முதல் மின்சாரக் கட்டணம் திருத்தம் செய்யப்பட உள்ளது. கடந்த 2022-2027 காலகட்டத்திற்காக அங்கீகரிக்கப்பட்ட தானியங்கி கட்டண திருத்த முறையின்படி, எரிபொருள் மற்றும் பராமரிப்பு செலவுகள் உயரும் போது கட்டணமும் மாற்றியமைக்கப்படும்; கடந்த ஆண்டு மின் கட்டணம் சுமார் 3.16 சதவீதம் உயர்த்தப்பட்டது நினைவுகூரத்தக்கது. இந்த ஆண்டும் அத்தகைய கட்டண உயர்வு தேவையா, அது நுகர்வோரையும் அரசின் நிதி நிலையையும் எவ்வாறு பாதிக்கும் என்பது குறித்தும், ஊழியர்களின் பிரச்சினைகள் குறித்தும் இக்கூட்டத்தில் விரிவாக விவாதிக்கப்பட்டு முடிவுகள் எடுக்கப்பட உள்ளன.