தமிழ் சினிமாவின் “திரைக்கதை மன்னன்” என்று போற்றப்படும் மூத்த இயக்குநரும் நடிகருமான கே.பாக்யராஜ் (73) இன்று காலை காலமானார். கோவாவில் நடைபெற்ற நடிகை குஷ்புவின் மகள் திருமணத்தில் தனது குடும்பத்துடன் கலந்துகொண்டுவிட்டு சென்னை திரும்பிய அவர், இன்று காலை வழக்கம்போல் நடைப்பயிற்சி (வாக்கிங்) சென்றுள்ளார். வீட்டிற்கு வந்தவுடன் திடீரென நெஞ்சு வலிப்பதாகக் கூறியதை அடுத்து, உடனடியாக அவர் அப்பல்லோ மருத்துவமனைக்கு அழைத்துச் செல்லப்பட்டார். எனினும், சிகிச்சை பலனின்றி அவர் உயிரிழந்தது ஒட்டுமொத்த சினிமா ரசிகர்களையும் பிரபலங்களையும் ஆழ்ந்த சோகத்தில் ஆழ்த்தியுள்ளது.
கோவாவில் நேற்று முன் தினம் வரை தங்களுடன் மகிழ்ச்சியாகப் பேசிவிட்டு, அதற்குள் இப்படி ஒரு துயரச் செய்தி வரும் என்று யாரும் எதிர்பார்க்கவில்லை என நடிகை சுஹாசினி மணிரத்னம் கண்ணீர் மல்கத் தெரிவித்துள்ளார். 1953 ஆம் ஆண்டு கோயம்புத்தூரில் பிறந்த பாக்யராஜ், இயக்குநர் பாரதிராஜாவிடம் உதவி இயக்குநராகத் தன் திரைப்பயணத்தைத் தொடங்கினார். ’16 வயதினிலே’ திரைப்படத்தில் சிறிய கதாபாத்திரத்தில் அறிமுகமாகி, பின்னர் 1979 இல் ‘புதிய வார்ப்புகள்’ படத்தின் மூலம் கதாநாயகனாக உயர்ந்தார். எளிய மனிதர்களின் வாழ்வியலையும் சுவாரசியமான திரைக்கதையையும் கையாள்வதில் தனக்கென ஒரு தனி முத்திரையைப் பதித்தவர் அவர்.
அவரது மறைவுச் செய்தியைக் கேட்டு, திரையுலகைச் சேர்ந்த பலரும் நேரில் வந்து அஞ்சலி செலுத்தி வருகின்றனர். குறிப்பாக, அவரிடம் உதவி இயக்குநர்களாகப் பணியாற்றிப் பின்னாளில் புகழ்பெற்ற இயக்குநர்களாகவும் நடிகர்களாகவும் உயர்ந்த பார்த்திபன், பாண்டியராஜன் உள்ளிட்டோர் தங்களது குருநாதரின் உடலுக்கு முதலில் வந்து அஞ்சலி செலுத்தினர். மேலும், தமிழக முன்னாள் முதலமைச்சர் மு.க. ஸ்டாலின் அவர்கள் பாக்யராஜின் இல்லத்திற்கு நேரில் சென்று, அவரது உடலுக்கு மலர்வளையம் வைத்து அஞ்சலி செலுத்தியதுடன், அவரது குடும்பத்தினருக்குத் தனது ஆழ்ந்த இரங்கலைத் தெரிவித்துக் கொண்டார்.