நாட்டின் தென்பகுதியில் உள்ள மகாநதி, கோதாவரி, கிருஷ்ணா, பெண்ணாறு மற்றும் காவிரி ஆகிய நதிகளைக் கால்வாய்கள் மூலம் இணைப்பதே காவிரி இணைப்புத் திட்டமாகும். மழைப்பொழிவு சீரற்று இருக்கும் சூழலில், உபரிநீர் உள்ள நதிகளிலிருந்து நீரைக் கொண்டுவந்து வறட்சியான நதிகளுக்குத் திருப்பி விடுவதே இதன் முக்கிய நோக்கமாகும். இத்திட்டம் முழுமையாகச் செயல்படுத்தப்பட்டால், தமிழகத்தின் டெல்டா பகுதிகள் உட்பட பல மாவட்டங்கள் கடுமையான வறட்சியிலிருந்து தப்பிக்கும் வாய்ப்பு உருவாகும்.
கடந்த 2002-ஆம் ஆண்டு, இந்த நதிநீர் இணைப்புத் திட்டத்தைச் செயல்படுத்தி உயர்த்தினால் தனது சார்பில் ரூ.1 கோடி நிதி உதவியாக வழங்கப்படும் என்று நடிகர் ரஜினிகாந்த் அறிவித்திருந்தார். விவசாயிகளின் நலன் மற்றும் மாநிலத்தின் குடிநீர் ஆதாரத்தைப் பெருக்கும் நோக்கில் அவர் அளித்த இந்த வாக்குறுதி மக்கள் மத்தியில் பெரும் வரவேற்பைப் பெற்றதுடன், நதிகள் இணைப்பு குறித்த விவாதங்களையும் மீண்டும் ஏற்படுத்தியது.
இன்று சென்னை சேத்துப்பட்டில் ‘மக்கள் மேடை’ அமைப்பு சார்பில் நடைபெற்ற பாரத சேவா இணையதள தொடக்க விழாவில் பங்கேற்ற லதா ரஜினிகாந்த், செய்தியாளர்களிடம் பேசுகையில் ரஜினிகாந்தின் நிதி உதவி குறித்து விளக்கமளித்தார். காவிரி இணைப்புத் திட்டம் எப்போது முழுமையாகச் செயல்படுத்தப்படுகிறதோ, அப்போதே ரஜினிகாந்த் தான் அளித்த வாக்குறுதியின்படி நிச்சயம் அந்த நிதியை வழங்குவார் என்று அவர் உறுதியளித்துள்ளார்.