உலகையே அதிரவைத்த ஹார்முஸ் நீரிணை தாக்குதல்… நடுக்கடலில் பயங்கரம்… துடிதுடித்த இந்தியர்கள், எரியும் கப்பல்கள்… ஈரான் தாக்குதலால் உச்சகட்ட பதற்றம்…!

சர்வதேச அளவில் மிக முக்கிய கடல்வழிப் பாதையாகக் கருதப்படும் ஹார்முஸ் நீரிணையில், ஐக்கிய அரபு அமீரகத்தின் கொடி ஏந்திய இரண்டு சரக்குக் கப்பல்கள் மீது ஈரான் நடத்திய ஏவுகணைத் தாக்குதல் மத்திய கிழக்கு பிராந்தியத்தில் கடுமையான போர் பதற்றத்தை ஏற்படுத்தியுள்ளது. ஓமன் நாட்டின் கடல் எல்லைக்குட்பட்ட ஹார்முஸ் நீரிணையின் தெற்குப் பகுதியில் பயணித்துக் கொண்டிருந்த ‘மொம்பாசா’ மற்றும் ‘பஹியா’ ஆகிய இரண்டு அமீரக தேசிய எண்ணெய் கப்பல்களைக் குறிவைத்து, ஈரான் ராணுவம் அதிநவீன க்ரூஸ் ஏவுகணைகளைச் செலுத்தி இந்தத் தாக்குதலை நடத்தியுள்ளது. ஏவுகணைகள் தாக்கிய அடுத்த சில நிமிடங்களில் கப்பல்களில் பயங்கர தீ விபத்து ஏற்பட்ட நிலையில், மீட்புக் குழுவினரின் நீண்ட போராட்டத்திற்குப் பிறகே தீ கட்டுக்குள் கொண்டு வரப்பட்டது.

இந்த கோர சம்பவத்தில் ‘மொம்பாசா’ கப்பலில் பணியிலிருந்த இந்திய ஊழியர் ஒருவர் சம்பவ இடத்திலேயே பரிதாபமாகப் பலியானார். மேலும், காயமடைந்த 8 ஊழியர்களில் 6 பேர் இந்தியர்கள் என்றும், 2 பேர் உக்ரைன் நாட்டைச் சேர்ந்தவர்கள் என்றும் ஐக்கிய அரபு அமீரக பாதுகாப்பு அமைச்சகம் அதிகாரப்பூர்வமாக அறிவித்துள்ளது. காயமடைந்தவர்களில் 4 பேரின் நிலைமை மிகவும் கவலைக்கிடமாக உள்ளதாக மருத்துவமனை வட்டாரங்கள் தெரிவிக்கும் நிலையில், பாதிக்கப்பட்ட இந்தியர்களின் குடும்பங்களுக்குத் தேவையான அனைத்து தூதரக உதவிகளையும் வழங்குவதற்கான ஏற்பாடுகளை அதிகாரிகள் தீவிரப்படுத்தியுள்ளனர்.

இதற்கிடையில், இந்தத் தாக்குதல் திட்டமிட்டு நடத்தப்பட்ட ஏவுகணைத் தாக்குதல் என்று அமீரகம் குற்றம் சாட்டியுள்ள நிலையில், தங்களது கடல் எல்லையில் சட்டவிரோதமாகப் பயணிக்க முயன்ற கப்பல்களை எச்சரிக்கும் நோக்கிலேயே துப்பாக்கிச் சூடு நடத்தியதாக ஈரான் தரப்பு வாதிடுகிறது. மேலும், இதே பகுதியில் அமெரிக்காவின் அதிநவீன ‘MQ-1’ ரக ட்ரோன் விமானத்தையும் சுட்டு வீழ்த்தியதாக ஈரான் புரட்சிகர காவல்படை கூறியுள்ளதால், அமெரிக்கா – ஈரான் இடையேயான நேரடி மோதல் சூழலும் தீவிரமடைந்துள்ளது. ஈரானின் இந்த அத்துமீறல் சர்வதேச கடல் சட்டங்களை முற்றிலும் மீறும் செயல் என்றும், இதற்குத் தகுந்த முறையில் பதிலடி கொடுக்கப்படும் என்றும் ஐக்கிய அரபு அமீரகம் தனது கடுமையான கண்டனங்களைப் பதிவு செய்துள்ளது.