பணத்தை கொடுக்காமல் போறீங்களா…? “குழந்தையை காணவில்லை சார்…” கண்ணீருடன் தாய் அளித்த புகார்…. விசாரணையில் அம்பலமான உண்மை…!!

சிவகங்கை மாவட்டம் காரைக்குடி பகுதியைச் சேர்ந்த கட்டிடத் தொழிலாளியின் மனைவி லட்சுமி என்பவருக்கு அண்மையில் நான்காவதாகப் பெண் குழந்தை பிறந்துள்ளது. ஏற்கெனவே மூன்று பெண் பிள்ளைகளுடன் கடும் வறுமையில் வாடிய இந்தத் தாயை நோட்டமிட்ட ஒரு கும்பல், குழந்தையைப் பணத்திற்காக விற்றுவிடுமாறு மருத்துவமனையிலேயே ஆசைவார்த்தை கூறி மூளைச்சலவை செய்துள்ளது. தொடக்கத்தில் இதற்கு உடன்படாத லட்சுமி, பின்னர் நிலவிய வறுமைச் சூழல் காரணமாகத் தனது 45 நாள்களேயான பச்சிளம் குழந்தையைச் சென்னையைச் சேர்ந்த ஒரு தம்பதிக்கு ஐந்து லட்சம் ரூபாய்க்கு விலை பேசிக் கைமாற்ற சம்மதித்துள்ளார். அதன் தொடர்ச்சியாக, சென்னை தம்பதியரால் அனுப்பி வைக்கப்பட்ட மூன்று பெண்கள் லட்சுமியின் வீட்டிற்கே நேரடியாக வந்து, முதற்கட்டமாக மூன்று லட்சம் ரூபாய் ரொக்கப் பணத்தைக் கொடுத்துவிட்டுப் பிஞ்சுக் குழந்தையைப் பெற்றுச் சென்றுள்ளனர்.

இருப்பினும், பேசிய தொகையில் மீதமுள்ள இரண்டு லட்சம் ரூபாயை அந்தப் பெண்கள் தராமல் ஏமாற்றியதால் ஆத்திரமடைந்த லட்சுமி, தனது குழந்தையைக் காணவில்லை என்று காவல் நிலையத்தில் நாடகமாடிப் புகார் அளித்துள்ளார். இந்த விவகாரத்தைக் கையில் எடுத்துத் தீவிர விசாரணையில் இறங்கிய காரைக்குடி தெற்கு போலீஸார், குழந்தையைக் கடத்தல்காரர்களிடமிருந்து பத்திரமாக மீட்டு உரியவர்களிடம் ஒப்படைத்ததோடு, இது கடத்தல் அல்ல, தாயின் சம்மதத்துடன் நடந்த சட்டவிரோத விற்பனை என்பதை அம்பலப்படுத்தினர். எவ்வித சட்ட விதிகளையும் பின்பற்றாமல் பச்சிளம் குழந்தையைப் பணத்திற்காக வியாபாரம் செய்த குழந்தையின் தாய் லட்சுமி மற்றும் சட்டவிரோத கொள்முதலில் ஈடுபட்ட சென்னையைச் சேர்ந்த நபர்கள் உட்பட இருதரப்பினர் மீதும் கடுமையான சட்டபூர்வ நடவடிக்கைகள் பாயும் என ஏ.எஸ்.பி ஆஷிஷ் புன்யா எச்சரித்துள்ளார்.