ஈரான் மீது அமெரிக்கா மற்றும் இஸ்ரேல் நடத்தி வரும் தாக்குதல்களுக்குப் பதிலடியாக, ரஷியத் தயாரிப்பு டிரோன்களைக் கொண்டு ஈரான் பதில் தாக்குதல் நடத்தி வருவதாக உக்ரைன் அதிபர் ஜெலன்ஸ்கி தெரிவித்துள்ளார். மேற்கத்திய நாடுகளின் பொருளாதாரத் தடைகளை முறியடிக்க சீனா, ரஷியா மற்றும் ஈரான் ஆகிய மூன்று நாடுகளும் இணைந்து ‘ஆக்சிஸ் ஆஃப் எவேஷன்’ (Axis of Evasion) என்ற ரகசியக் கூட்டணியை உருவாக்கியுள்ளன.
இதன் மூலம் சீனா ஈரானிடமிருந்து கச்சா எண்ணெயை இறக்குமதி செய்வதுடன், அதற்குப் பதிலாக அதிநவீன தொழில்நுட்பங்கள் மற்றும் மின்னணு உதிரிபாகங்களை வழங்கி வருகிறது. குறிப்பாக, ஈரானிய ஏவுகணைகள் துல்லியமாக இலக்கைத் தாக்க சீனாவின் ‘BeiDou’ செயற்கைக்கோள் வழிகாட்டுதல் அமைப்பு பெரும் உதவியாக உள்ளது.
இந்த ரகசியக் கூட்டணியின் கீழ் ரஷியாவிலேயே ஈரானிய தொழில்நுட்பத்துடன் டிரோன் தொழிற்சாலைகள் அமைக்கப்பட்டுள்ளதோடு, ஏவுகணை தயாரிப்புக்குத் தேவையான வேதிப்பொருட்களைச் சீனா ரகசியமாக விநியோகித்து வருகிறது. அமெரிக்காவின் ஜிபிஎஸ் வசதிக்கு மாற்றாகச் சீனாவின் தொழில்நுட்பத்தைப் பயன்படுத்தி அமெரிக்கப் படைகளை ஈரான் நிலைகுலையச் செய்து வருகிறது.
இந்தப் போரை முடிவுக்குக் கொண்டுவர வேண்டுமானால், ஈரானுக்குப் பின்னால் இருக்கும் சீனா மற்றும் ரஷியாவின் விநியோகச் சங்கிலியை உடைக்க வேண்டிய கட்டாயம் அதிபர் டிரம்பிற்கு ஏற்பட்டுள்ளது. இதன் காரணமாகவே அவர் நேரடிப் போரைத் தவிர்த்துவிட்டு, பேச்சுவார்த்தை மூலம் அமைதி காண முயற்சிப்பதாக அரசியல் வல்லுநர்கள் கருதுகின்றனர்.