காஞ்சிபுரம் மாவட்டம் படப்பை அருகே உள்ள அம்மணம்பாக்கம் கிராமத்தில், கானா பாடகர்களான பரத் மற்றும் சீனு ஆகிய இருவர் கொடூரமாக வெட்டிப் படுகொலை செய்யப்பட்டுள்ளனர். நேற்று இரவு நடைபெற்ற ஒரு பாடல் நிகழ்ச்சியை முடித்துக் கொண்டு, அவர்கள் இருவரும் அதே பகுதியில் உள்ள தங்களது நண்பரான லோகேஷ் என்பவரின் வீட்டில் தங்கியிருந்தனர். அப்போது நள்ளிரவு நேரத்தில், இருசக்கர வாகனங்களில் ஹெல்மெட் அணிந்து வந்த ஆறு பேர் கொண்ட மர்ம கும்பல் ஒன்று திடீரென வீட்டிற்குள் புகுந்துள்ளது.
வீட்டிற்குள் நுழைந்த அந்த கும்பல், தூங்கிக் கொண்டிருந்த பரத் மற்றும் சீனு மீது அரிவாள் உள்ளிட்ட பயங்கர ஆயுதங்களால் சரமாரியாக தாக்குதல் நடத்தியுள்ளது. இந்த கொடூர தாக்குதலில் நிலைகுலைந்த இருவரும் சம்பவ இடத்திலேயே ரத்த வெள்ளத்தில் பரிதாபமாக உயிரிழந்தனர். இப்படுகொலையை அரங்கேற்றிய பின், அந்த ஆறு பேர் கொண்ட மர்ம கும்பல் அங்கிருந்து தப்பி ஓடிவிட்டது. இச்சம்பவம் குறித்து தகவல் அறிந்து விரைந்து வந்த படப்பை மற்றும் மணிமங்கலம் போலீசார், உயிரிழந்த இருவரின் உடல்களையும் கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர்.
இந்த இரட்டை கொலை சம்பவம் முன்விரோதம் காரணமாக நடந்ததா அல்லது வேறு ஏதேனும் காரணமா என்ற கோணங்களில் போலீசார் தீவிர விசாரணை மேற்கொண்டு வருகின்றனர். மேலும், ஹெல்மெட் அணிந்து வந்து கொலையில் ஈடுபட்ட மர்ம நபர்களை அடையாளம் காண்பதற்காக, அப்பகுதியில் உள்ள சிசிடிவி கேமரா காட்சிகளையும் போலீசார் தீவிரமாக ஆய்வு செய்து வருகின்றனர். அமைதியான கிராமப்புற பகுதியில் நள்ளிரவில் அரங்கேறிய இந்த இரட்டைப் படுகொலை சம்பவம் அப்பகுதி பொதுமக்களிடையே பெரும் அதிர்ச்சியையும் அச்சத்தையும் ஏற்படுத்தியுள்ளது.