தமிழக வெற்றிக் கழகத்தின் மாநில நிர்வாகக் குழு தலைமை ஒருங்கிணைப்பாளர் செங்கோட்டையன், கோவை விமான நிலையத்தில் செய்தியாளர்களைச் சந்தித்து அரசியல் சூழல் குறித்துப் பேசினார். அப்போது, அ.தி.மு.க மற்றும் தி.மு.க ஆகிய இரு கட்சிகளுமே அண்ணா மற்றும் ஜெயலலிதா போன்ற தலைவர்களை மறந்துவிட்டதாகக் குற்றம் சாட்டிய அவர், இதனால்தான் தான் கட்சியை விட்டு வெளியேறியதாகத் தெரிவித்தார். மேலும், த.வெ.க மீது தொடுக்கப்படும் பலமுனைத் தாக்குதல்கள் அந்தக் கட்சியின் வெற்றிக்கான அறிகுறி என்றும், எதிர்க்கட்சியான அ.தி.மு.க, ஆளுங்கட்சியின் குறைகளைச் சுட்டிக்காட்டுவதை விடுத்து புதிய கட்சிகளை விமர்சிப்பது தி.மு.க-வின் ‘பி டீம்’ போலச் செயல்படுவதைக் காட்டுவதாகவும் அவர் விமர்சித்தார்.
கூட்டணி குறித்த கேள்விகளுக்குப் பதிலளித்த செங்கோட்டையன், டி.டி.வி. தினகரன் மற்றும் ஓ.பி.எஸ் ஆகியோரின் அரசியல் நிலைப்பாடுகள் குறித்துத் தனது கருத்துகளைப் பகிர்ந்துகொண்டார். குறிப்பாக, பா.ம.க நிறுவனர் டாக்டர் ராமதாஸ் த.வெ.க-வுடன் பேச்சுவார்த்தை நடத்தியதாக எழுந்துள்ள செய்திகள் குறித்துக் கேட்டபோது, “நல்லது நடக்கட்டும்” என்று சூசகமாகப் பதிலளித்தார். தன் மீது சுமத்தப்படும் ஊழல் குற்றச்சாட்டுகளை மறுத்த அவர், அரசியல் காழ்ப்புணர்ச்சியால் போடப்பட்ட வழக்குகளில் நீதிமன்றத் தீர்ப்புகள் மூலம் தனது தூய்மை நிரூபிக்கப்பட்டுள்ளதாகவும், ஆதாரமின்றிப் பேசினால் சட்டப்படி நடவடிக்கை எடுப்பேன் என்றும் எச்சரித்தார்.