தமிழகத்தில் தவெக கூட்டணி ஆட்சியில், தாம்பரம் தொகுதி எம்.எல்.ஏ-வும் மனித வள மேம்பாட்டுத் துறை அமைச்சருமான சரத்குமார், உள்ளாட்சி பிரதிநிதிகளின் முட்டுக்கட்டையால் தன் தொகுதி மக்களுக்கு நலத்திட்டங்களை செயல்படுத்த முடியாத சூழல் நிலவுவதாக வேதனையுடன் தெரிவித்துள்ளார். தாம்பரம் பகுதியில் நடைபெற்ற நலத்திட்ட உதவிகள் வழங்கும் விழாவில் பங்கேற்றுப் பேசிய அவர், “அமைச்சராக இருந்தாலும் தாம்பரம் மக்களுக்குப் பணியாற்ற அதிகாரிகள் மூலம் நடவடிக்கை எடுத்தால், அதை உள்ளாட்சிப் பிரதிநிதிகள் தடுத்து நிறுத்துகிறார்கள். மக்கள் தங்களையே கவுன்சிலராகத் தேர்ந்தெடுத்துள்ளதாகக் கூறி மக்கள் பணிகளுக்கு முட்டுக்கட்டை போடுகின்றனர்” என்று பகிரங்கமாகக் குற்றம்சாட்டினார். வரும் மாநகராட்சித் தேர்தலில் முதல்வர் ஜோசப் விஜய் கைக்காட்டும் வேட்பாளர்களை வெற்றி பெறச் செய்ய வேண்டும் என்றும் அவர் கேட்டுக்கொண்டார்.
தமிழக சட்டசபைத் தேர்தலில் 108 இடங்களில் வெற்றி பெற்று, கூட்டணி கட்சிகளின் ஆதரவுடன் தவெக ஆட்சி அமைத்துள்ள நிலையில், கடந்த 2022-இல் தேர்வு செய்யப்பட்ட திமுக உள்ளாட்சி பிரதிநிதிகளின் பதவிக்காலம் வரும் பிப்ரவரியுடன் முடிகிறது. இதனிடையே, 7 தொகுதி இடைத்தேர்தல்களும் உள்ளாட்சித் தேர்தலும் விரைவில் வரவிருக்கும் சூழலில், ஆளும் அரசுக்கும் உள்ளாட்சி அமைப்புகளுக்கும் இடையிலான இந்த மோதல் போக்கு தீவிரமடைந்துள்ளது. குறிப்பாக, முதல்வர் ஜோசப் விஜய் பெரம்பூர் தொகுதி அலுவலகத் திறப்பு விழா உள்ளிட்ட நிகழ்வுகளில் பங்கேற்றபோதிலும், சென்னை மேயர் ஆர்.பிரியா கடந்த இரண்டு மாதங்களாக அவரை மரியாதை நிமித்தமாகக்கூட சந்திக்காதது அரசியல் வட்டாரத்தில் பெரும் விவாதப் பொருளாக மாறியுள்ளது.
இதற்கு “எனக்கு அழைப்பு விடுக்கப்படாததால் தான் நான் செல்லவில்லை” என்று மேயர் பிரியா விளக்கமளித்திருந்தாலும், ஆளும் கட்சிக்கும் உள்ளாட்சி பிரதிநிதிகளுக்கும் இடையே புகையும் இந்த பிணக்கு மக்கள் நலப்பணிகளை முடக்குவதாக குற்றச்சாட்டுகள் எழுந்துள்ளன. விரைவில் நடைபெறவிருக்கும் உள்ளாட்சித் தேர்தல் மட்டுமே இந்த நிர்வாக ரீதியிலான முட்டுக்கட்டைகளுக்குத் தீர்வு காணும் எனக் கருதப்படுகிறது. சரத்குமாரின் இந்த வெளிப்படையான ஆதங்கம், வரவிருக்கும் உள்ளாட்சித் தேர்தலுக்கான அரசியல் களம் தற்போதே சூடுபிடிக்கத் தொடங்கிவிட்டதை உணர்த்துகிறது.