2026 தமிழக சட்டமன்றத் தேர்தலை முன்னிட்டு அரசியல் களம் தற்போதே சூடுபிடிக்கத் தொடங்கியுள்ளது. நடிகர் விஜய் தலைமையிலான தமிழக வெற்றிக் கழகம் திமுக கூட்டணியில் நீண்டகாலமாக அங்கம் வகிக்கும் காங்கிரஸ் கட்சிக்கு அதிகாரப் பகிர்வுடன் கூடிய ஒரு மெகா கூட்டணியை முன்மொழிந்துள்ளதாகத் தகவல்கள் வெளியாகியுள்ளன. தவெக-வின் இந்தத் திடீர் வியூகம் தமிழக அரசியலில் பெரும் பரபரப்பை ஏற்படுத்தியுள்ளது.
இந்த அதிகாரப் பகிர்வு ஒப்பந்தத்தின்படி, காங்கிரஸ் கட்சிக்கு 50 சட்டமன்றத் தொகுதிகள் ஒதுக்கப்படும் எனத் தெரிகிறது. அதுமட்டுமின்றி, ஆட்சி அமைக்கும் பட்சத்தில் ஒரு துணை முதல்வர் பதவி மற்றும் 6 அமைச்சர் பதவிகள் காங்கிரஸிற்கு வழங்கப்படும் என தவெக தரப்பிலிருந்து ‘ஆஃபர்’ கொடுக்கப்பட்டுள்ளதாகக் கூறப்படுகிறது. தமிழகத்தில் கடந்த பல தசாப்தங்களாக ஆட்சியில் பங்கு கிடைக்காமல் இருக்கும் காங்கிரஸிற்கு, இது ஒரு கௌரவமான மற்றும் கவர்ச்சிகரமான வாய்ப்பாகக் கருதப்படுகிறது.
தற்போதைய திமுக கூட்டணியில் காங்கிரஸ் கட்சிக்குக் குறிப்பிட்ட இடங்கள் மட்டுமே ஒதுக்கப்பட்டு வரும் நிலையில், தவெக முன்வைத்துள்ள இந்த அதிகாரப் பகிர்வுத் திட்டம் அக்கட்சியின் டெல்லி தலைமையைப் யோசிக்க வைத்துள்ளது. தமிழக காங்கிரஸ் தலைவர்கள் இது குறித்துக் கருத்து தெரிவிக்கத் தயங்கினாலும், சோனியா காந்தி மற்றும் ராகுல் காந்தி உள்ளிட்ட மேலிடத் தலைவர்களே இது குறித்த இறுதி முடிவை எடுப்பார்கள் என எதிர்பார்க்கப்படுகிறது.
விஜய்யின் தமிழக வெற்றிக் கழகம், தமிழ்நாடு மட்டுமின்றி புதுச்சேரி மற்றும் கேரளாவிலும் காங்கிரஸுடன் கைகோர்க்கத் தயாராக இருப்பதாகத் தெரிகிறது. இந்த மெகா கூட்டணி அமைந்தால், அது 2026 தேர்தலில் திமுக மற்றும் அதிமுக ஆகிய இரு துருவ அரசியலுக்குப் பெரும் சவாலாக அமையும். ராகுல் காந்தி இந்த வாய்ப்பைச் சரியாகப் பயன்படுத்தித் தமிழகத்தில் காங்கிரஸ் மீண்டும் அதிகாரத்தைப் பிடிக்க வழிவகை செய்வாரா என்பதே தற்போதைய அரசியல் ஆர்வலர்களின் எதிர்பார்ப்பாக உள்ளது.