தமிழக அரசியலில் தற்போதைய ஹாட் டாபிக், தமிழக வெற்றிக் கழகத்தின் அசுர வளர்ச்சியும், அதை நோக்கி நகரும் மூத்த அரசியல்வாதிகளின் அரசியல் நகர்வுகளும்தான். அந்த வகையில், அண்மையில் தவெகவில் இணைந்த விளவங்கோடு தொகுதியின் முன்னாள் எம்எல்ஏ விஜயதரணி, தனது அரசியல் வியூகத்தை கன்னியாகுமரியில் இருந்து சென்னைக்கு மாற்றத் திட்டமிட்டுள்ளதாக நம்பத்தகுந்த வட்டாரங்கள் தெரிவிக்கின்றன. சட்டசபைத் தேர்தலில் தவெக பெற்ற பெரும் வெற்றிக்குப் பிறகு, அக்கட்சியில் இணைந்த விஜயதரணியின் அடுத்தகட்ட பிளான் என்ன என்பதுதான் தற்போதைய அரசியல் விவாதமாக மாறியுள்ளது.
காங்கிரஸ் கட்சியின் முக்கிய முகமாக இருந்த விஜயதரணி, கடந்த 2024 மக்களவைத் தேர்தலுக்கு முன்பாக பாஜகவில் இணைந்தார். ஆனால், அங்கு அவருக்கு எதிர்பார்த்த முக்கியத்துவமோ அல்லது பொறுப்போ கிடைக்கவில்லை. பின்னர் நடந்த சட்டசபைத் தேர்தலில் மீண்டும் விளவங்கோடு தொகுதியில் போட்டியிடும் வாய்ப்பு கிடைத்த போதிலும், அவரால் வெற்றி பெற முடியவில்லை. இந்த தோல்வியினாலும், கன்னியாகுமரி மாவட்ட மக்களிடையே எழுந்த விமர்சனங்களினாலும் அதிருப்தியடைந்த அவர், உடனடியாக பாஜகவிலிருந்து விலகி தவெகவில் ஐக்கியமானார்.
இனிவரும் காலங்களில் கன்னியாகுமரி மாவட்ட அரசியலில் தனக்கு சாதகமான சூழல் இருக்காது என்பதை உணர்ந்த விஜயதரணி, தனது அரசியல் தளத்தை சென்னைக்கு மாற்ற காய் நகர்த்தி வருகிறார். வரவிருக்கும் லோக்சபா தேர்தலில் சென்னை, செங்கல்பட்டு, காஞ்சிபுரம் அல்லது திருவள்ளூர் ஆகிய மாவட்டங்களில் உள்ள ஏதேனும் ஒரு தொகுதியில் போட்டியிட அவர் தீவிரம் காட்டி வருகிறார். இதற்காக தவெகவின் முக்கிய நிர்வாகியான ஆதவ் அர்ஜுனா மூலமாக இப்போதே கட்சித் தலைமையிடம் பேச்சுவார்த்தை நடத்தத் தொடங்கியுள்ளதாக சொல்லப்படுகிறது.
சென்னை மற்றும் அதன் சுற்றியுள்ள மாவட்டங்களில் தவெகவுக்கு தற்போது மிகப்பெரிய ஆதரவு அலை வீசி வருவதால், இங்கு போட்டியிட்டால் எளிதாக வென்றுவிடலாம் என்பது விஜயதரணியின் கணக்காக உள்ளது. காங்கிரஸ் மற்றும் பாஜக ஆகிய இரு கட்சிகளிலும் எம்பி சீட் கேட்டு ஏமாற்றமடைந்த விஜயதரணிக்கு, தவெக தலைமை சென்னை தொகுதியை ஒதுக்குமா? அவரது இந்த புதிய அரசியல் நகர்வு கைகொடுக்குமா என்பதைப் பொறுத்திருந்துதான் பார்க்க வேண்டும்.