“விஜய்க்கு வேட்டு வைத்த சொந்தக்கட்சி நிர்வாகிகள்?”… கட்சிக்குள்ளேயே கறுப்பு ஆடு… வெளிவந்த திடுக்கிடும் உண்மை…!

தமிழக வெற்றிக் கழகத் தலைவர் விஜய்யின் வழக்கறிஞர் குழு மற்றும் மூத்த நிர்வாகிகள் செய்த அடுத்தடுத்த குளறுபடிகள், அக்கட்சிக்கு தொடக்கம் முதலே பெரும் பின்னடைவை ஏற்படுத்தி வருகின்றன. 2026 சட்டசபைத் தேர்தலில் 108 இடங்களைப் பிடித்து தனிப்பெரும் கட்சியாக உருவெடுத்தும், தவெக இதுவரை ஆட்சி அமைக்க முடியாமல் திண்டாடி வருவதற்கு நிர்வாக ரீதியான தவறுகளே முக்கிய காரணமாகப் பார்க்கப்படுகிறது. குறிப்பாக, ஆளுநர் அர்லேகரைச் சந்தித்து ஆட்சி அமைக்க உரிமை கோரியபோது, தங்களை ஒரு தனிப்பெரும் கட்சி என்று முன்னிறுத்தி அறிக்கை அளிக்காமல், காங்கிரஸ் எம்எல்ஏ-க்களின் பட்டியலையும் சேர்த்து வழங்கியதே தற்போதைய சிக்கலின் ஆணிவேராக அமைந்துள்ளது.

ஆளுநருடனான இரண்டாவது சந்திப்பின் போது, ஆட்சி அமைப்பதற்கான அறுதிப் பெரும்பான்மை தவெகவிடம் இல்லை என்பதால் அழைப்பு விடுக்க முடியாது என ஆளுநர் தரப்பில் விளக்கம் அளிக்கப்பட்டுள்ளது. சட்டப்படி தனிப்பெரும் கட்சி என்ற அடிப்படையில் உரிமை கோரியிருந்தால், ஆளுநர் பதவிப் பிரமாணம் செய்து வைத்துவிட்டு, சட்டசபையில் பெரும்பான்மையை நிரூபிக்க காலக்கெடு விதித்திருப்பார். ஆனால், காங்கிரஸ் ஆதரவுடன் கூட்டணி ஆட்சி என்று குறிப்பிட்டதால், மீதமுள்ள 6 எம்எல்ஏ-க்களின் பட்டியல் எங்கே என்ற கேள்வியை ஆளுநர் எழுப்பியுள்ளார். இதனால் விஜய் தரப்பு தற்போது தர்மசங்கடமான நிலையில் வழக்கறிஞர்களுடன் தீவிர ஆலோசனை மேற்கொண்டு வருகிறது.

நிர்வாகிகளின் இந்த அலட்சியப் போக்கு இது முதல்முறையல்ல என்பதும் குறிப்பிடத்தக்கது. ஏற்கனவே தேர்தல் களத்தில் வேட்புமனு தாக்கலின் போதே, விஜய்யின் வயது மற்றும் அவர் மீதான வழக்குகள் தொடர்பான விவரங்களை மாற்றி மாற்றி நிரப்பியதால் பெரும் சர்ச்சை வெடித்தது. இதனால் விஜய் இரண்டு தொகுதிகளிலும் இரண்டு முறை கூடுதல் பிரமாண பத்திரங்களைத் தாக்கல் செய்ய வேண்டிய கட்டாயத்திற்குத் தள்ளப்பட்டார். இதுபோன்ற தொடர் சட்டச் சிக்கல்களும், தெளிவற்ற திட்டமிடலும் கட்சியின் செல்வாக்கை மக்கள் மத்தியில் கேள்விக்குறியாக்கி வருகின்றன.

தற்போது ஏற்பட்டுள்ள இந்த முட்டுக்கட்டையால் தவெக தொண்டர்கள் கடும் அதிருப்தியில் உள்ளனர். கட்சியின் முக்கிய முடிவுகளை எடுக்கும் வழக்கறிஞர் குழுவின் போதிய அனுபவமின்மை, ஒரு வரலாற்று வெற்றியைப் பெற்றும் ஆட்சிக்கட்டிலில் அமர முடியாத சூழலை உருவாக்கியுள்ளதாக விமர்சனங்கள் எழுந்துள்ளன. சிரஞ்சீவி போன்ற திரைத்துறை பிரபலங்களின் அரசியல் சறுக்கல்களைப் போல விஜய்யின் நிலையும் மாறிவிடுமோ என்ற அச்சத்தில் உள்ள தொண்டர்கள், தலைமை தனது நிர்வாகக் குழுவை உடனடியாகச் சீரமைக்க வேண்டும் என வலியுறுத்தி வருகின்றனர்.