ராணிப்பேட்டை மேற்கு மாவட்ட தமிழக வெற்றிக் கழகச் செயலாளர் விஜய்மோகன் மீது, ஆற்காடு பகுதியைச் சேர்ந்த பவ்யலட்சுமி என்ற பெண் அண்மையில் பாலியல் புகாரளித்தது அரசியல் வட்டாரத்தில் பெரும் பரபரப்பை ஏற்படுத்தியது. இன்ஸ்டாகிராம் மூலம் அறிமுகமான விஜய்மோகன், மகளிர் அணியில் முக்கியப் பொறுப்பு வாங்கித் தருவதாகக் கூறி புகைப்படங்களைப் பெற்று மிரட்டியதாக அப்பெண் புகார் அளித்திருந்தார். இதன் அடிப்படையில் ஆற்காடு நகரக் காவல் துறையினர் விஜய்மோகன் மீது நான்கு சட்டப்பிரிவுகளின் கீழ் வழக்குப் பதிவு செய்து தீவிர விசாரணை மேற்கொண்டு வந்தனர்.
காவல் துறையினரின் முறையான முதற்கட்ட விசாரணையில், இப்புகாரின் பின்னணியில் பல்வேறு திடுக்கிடும் உண்மைகள் வெளிவரத் தொடங்கின. விஜய்மோகன் மீதான பாலியல் குற்றச்சாட்டு முற்றிலுமாக சோடிக்கப்பட்டது என்பதும், இதன் பின்னணியில் திட்டமிடப்பட்ட அரசியல் சதி அடங்கியுள்ளது என்பதும் தெரியவந்தது. மேலும், இச்சம்பவம் தொடர்பாகப் புகார் அளித்த பெண் தனது கூட்டாளிகளுடன் உரையாடிய பல தொலைபேசி ஆடியோ பதிவுகள் வெளியாகி, வழக்கில் திருப்பத்தை ஏற்படுத்தின.
இதனைத் தொடர்ந்து, பொய்ப் புகார் அளித்து மிரட்டிப் பணம் பறிக்க முயன்றதாகப் புகார் அளித்த பவ்யலட்சுமி, அவரது கணவர் நவீன் மற்றும் இந்த கூட்டுச்சதிக்கு உடந்தையாக இருந்த சில நபர்கள் மீது ராணிப்பேட்டை அனைத்து மகளிர் காவல் துறையினர் வழக்குப் பதிவு செய்துள்ளனர். அரசியல் லாபத்திற்காகவும், தனிப்பட்ட ஆதாயத்திற்காகவும் பொய்யான புகாரைப் புனைந்து வழக்குப் பதிவு செய்ய வைத்தது விசாரணையில் உறுதி செய்யப்பட்டுள்ளது.
வழக்குப் பதிவு செய்யப்பட்டதைத் தொடர்ந்து, பவ்யலட்சுமி மற்றும் அவரது கணவர் நவீன் ஆகிய இருவரும் கைது நடவடிக்கைக்குப் பயந்து தலைமறைவாகிவிட்டதாகத் தகவல்கள் வெளியாகியுள்ளன. சதியில் ஈடுபட்ட இருவரையும் கைது செய்யக் காவல் துறையினர் தனிப்படை அமைத்துத் தீவிரமாகத் தேடி வருகின்றனர். தலைமறைவாக உள்ள நபர்கள் பிடிபட்டால் மட்டுமே இந்தச் சதியின் பின்னணியில் செயல்பட்ட மற்ற நபர்கள் பற்றிய முழு விவரங்களும் வெளிவரும் என எதிர்பார்க்கப்படுகிறது.
தவெக நிர்வாகி மீது அவதூறு பரப்பும் நோக்கில் திட்டமிட்டுப் பொய்ப் புகார் அளிக்கப்பட்டதும், தற்போது அக்குற்றச்சாட்டு பொய்யென நிரூபணமாகி புகார் அளித்த பெண் மீதே காவல் துறை வழக்குப் பதிவு செய்துள்ளதும் அப்பகுதியில் பெரும் பரபரப்பை ஏற்படுத்தியுள்ளது. இச்சம்பவம், அரசியல் களத்தில் பொய்யான குற்றச்சாட்டுகளைப் பயன்படுத்தி நிர்வாகிகளின் பெயரைக் கெடுக்க நடக்கும் சதிகளுக்குச் சான்றாக அமைந்துள்ளதாகத் தொண்டர்கள் கருத்து தெரிவித்து வருகின்றனர்.