தமிழக அரசியலில் புதியதொரு அத்தியாயத்தைத் தொடங்கி, முதலமைச்சராக அரியணை ஏறியுள்ள தமிழக வெற்றிக் கழகத்தின் தலைவர் விஜய், சட்டப்பேரவையில் ஆளுநர் உரைக்கு நன்றி தெரிவிக்கும் தீர்மானத்தின் மீது ஆற்றிய உரை பெரும் அரசியல் அதிர்வலைகளை ஏற்படுத்தியுள்ளது. நீண்டகாலமாகத் தமிழகத்தை உலுக்கி வரும் ‘பதவி வெறி பிடித்த’ அரசியலை உடைத்தெறிவதே தனது இலக்கு என்று முழங்கிய அவர், கடந்த 40 நாட்களிலேயே மக்கள் தங்களது ஆட்சியின் வேகத்தையும் நேர்மையையும் உணர்ந்திருப்பதாகக் குறிப்பிட்டார். “இது வெறும் ஆரம்பம் மட்டும்தான்” என்று எச்சரித்த முதலமைச்சர், எதிர்க்கட்சிகளின் விமர்சனங்களைச் சற்றும் தயங்காமல் நேருக்கு நேர் எதிர்கொண்டு தனது அரசியல் முதிர்ச்சியையும் துணிச்சலையும் வெளிப்படுத்தியுள்ளார்.
கடந்த கால ஆட்சியாளர்களின் நிதி நிர்வாகக் குளறுபடிகளை மிகக் கடுமையாகச் சாடிய முதலமைச்சர் விஜய், குறிப்பாக திமுக மீதான தனது நேரடித் தாக்குதலைத் தொடுத்தார். 2017-ஆம் ஆண்டின் பிற்பகுதியில் இருந்து 2026 ஏப்ரல் மாதம் வரை ஆட்சிப் பொறுப்பில் இருந்தவர்கள் ஒவ்வொரு துறையிலும் ஏற்படுத்திய பெரும் ‘ஓட்டைகளை’ அடைக்கும் பணியில் தற்போதைய அரசு தீவிரமாக ஈடுபட்டுள்ளதாகக் கூறினார். தமிழகக் கருவூலத்தின் நிலையை விளக்கித் தங்களது அரசு வெளியிட்ட வெள்ளை அறிக்கையைச் சுட்டிக்காட்டிய அவர், “அன்றைய காலத்தில் ‘பிள்ளையோ பிள்ளை’ என்று சொன்னார்கள், ஆனால் இவர்களின் ஆட்சியால் தமிழ்நாட்டிற்கு ‘தொல்லையோ தொல்லை’ தான் மிஞ்சியது” என ரைமிங்காக வசனம் பேசி சபையை அதிரவைத்தார்.
தனது அமைச்சர்களுக்கும் தவெக சட்டமன்ற உறுப்பினர்களுக்கும் ஆட்சி செய்யத் தெரியாது என்று விமர்சிப்பவர்களுக்கு, முதலமைச்சர் விஜய் அடுக்கடுக்கான கேள்விகளுடன் தகுந்த பதிலடி கொடுத்துள்ளார். “ஆமாம், எங்களுக்குத் தெரியாதுதான்! மக்கள் பணி செய்யத் தெரிந்த எங்களுக்கு, மக்கள் பணத்தைச் சுருட்டத் தெரியாது; டெண்டர்களில் ஊழல் செய்யத் தெரியாது; அரசு வேலைகளையும் பணியிட மாற்றங்களையும் காசாக்கத் தெரியாது; கோயில் பணத்தைக் கொள்ளையடிக்கவும், கனிம வளங்களைச் சுரண்டவும் எங்களுக்குத் தெரியவே தெரியாது” என்று ஆவேசமாகப் பதிலளித்தார். இதன்மூலம், எதிர்க்கட்சிகளின் ஊழல் முறைகேடுகளைப் பட்டியலிட்டு, தங்களது நேர்மையைக் கட்சியின் பலமாக மக்கள் மத்தியில் கொண்டு சேர்த்துள்ளார்.
மேலும், அரசு வருமானத்தைத் தனிநபர் கஜானாவிற்கு மாற்றத் தெரியாத தங்களுக்கு, போதைப்பொருள் கலாசாரத்தைத் தடுக்கவும், பெண்களை மாண்போடு நடத்தவும் மட்டுமே தெரியும் என்று பெருமிதத்தோடு குறிப்பிட்டார். பெண்களை இழிவுபடுத்தும் விதமாகப் பேசப்படும் ‘ஓசி பஸ்’ மற்றும் ‘ஆயிரம் ரூபாய்’ போன்ற தரம் தாழ்ந்த அரசியல் விமர்சனங்களுக்குத் தவெக ஆட்சியில் இடமில்லை என்பதைத் தெளிவுபடுத்தியுள்ளார். தங்களுக்கு எதிராக ஒன்றுசேரும் எதிர்க்கட்சிகளின் சதித்திட்டங்களை மக்களே பார்த்துக் கொள்வார்கள் என்று நம்பும் முதலமைச்சர் விஜய், “எதிர்க்கட்சிகளைப் போல முறைகேடுகள் செய்வதை நாங்கள் எப்போதும் கற்றுக்கொள்ளப் போவதில்லை; அது கடைசி வரை எங்களுக்குத் தெரியாமலேயே இருக்கட்டும், அதில் நாங்களும் எங்கள் மக்களும் மகிழ்ச்சியாகவே இருக்கிறோம்” என்று தனது உரையை கம்பீரமாக நிறைவு செய்துள்ளார்.