தவெக பரப்புரைச் செயலாளரான நாஞ்சில் சம்பத் தனது எக்ஸ் பக்கத்தில் வெளியிட்டுள்ள கவித்துவமானப் பதிவு, தமிழக அரசியல் வட்டாரத்தில் பெரும் விவாதத்தையும் பரபரப்பையும் ஏற்படுத்தியுள்ளது. “போனால் போகட்டும் போடா.. என்னுடைய பகலை எவரும் இருட்டாக்க முடியாது.. என்னுடைய வெளிச்சத்தை யாரும் அணைக்க முடியாது.. என்னுடைய காற்றை யாரும் வழிமறிக்க முடியாது” என்று அவர் பதிவிட்டுள்ள வரிகள், கட்சித் தலைமை மீதான அவரது அதிருப்தியையே வெளிப்படுத்துவதாக அரசியல் விமர்சகர்கள் கருதுகின்றனர்.
கடந்த ஆண்டு டிசம்பர் மாதம் விஜய் முன்னிலையில் தவெகவில் இணைந்த நாஞ்சில் சம்பத், கட்சியின் கருத்துகளை ஊடகங்களில் ஆணித்தரமாகப் பதிவு செய்து வந்தார். எனினும், சமீபத்தில் நடைபெற்ற மதுராந்தகம் மற்றும் தாராபுரம் சட்டமன்ற இடைத்தேர்தலுக்கானப் பொறுப்பாளர்கள் பட்டியலிலும், பிரச்சார அழைப்பிலும் அவரது பெயர் புறக்கணிக்கப்பட்டது. மேலும், தனியார் தொலைக்காட்சி விவாதம் ஒன்றில் தவெக ஆட்சியின் சில குறைகள் குறித்து அவர் பேசியது கட்சித் தலைமைக்கு அதிர்ச்சியை ஏற்படுத்திய நிலையில், இந்தத் புறக்கணிப்புகள் அவரது அதிருப்தியை தீவிரமாக்கியுள்ளதாகக் கூறப்படுகிறது.
மதிமுக, அதிமுக, டிடிவி தினகரன் அணி, மற்றும் திமுக மேடைகள் எனத் தனது வசீகரமானப் பேச்சாற்றலால் தமிழக அரசியலில் தனக்கெனத் தனிமுத்திரை பதித்தவர் நாஞ்சில் சம்பத். அதிமுகவில் இருந்தபோது அவருக்கு பிரச்சாரத்திற்காக இன்னோவா காரே பரிசளிக்கப்படும் அளவுக்கு முக்கியத்துவம் தரப்பட்டது. எனினும், பல்வேறு சூழல்களில் மூத்த தலைவர்களுடன் ஏற்பட்ட மனக்கசப்புகளால் அடுத்தடுத்து மாற்றுப் பாதைகளைத் தேர்ந்தெடுத்து வந்த அவர், தற்போது தவெகவிலும் ஓரங்கட்டப்படுகிறாரோ என்ற கேள்வி எழுந்துள்ளது.
நாஞ்சில் சம்பத்தின் இந்த அதிரடிப் பதிவு, தவெக தலைமை அவரைத் தொடர்ந்து கண்டு கொள்ளாததால் எழுந்த விரக்தியா அல்லது அவரது சமீபத்திய பேச்சு காரணமாகத் தலைமை அவர் மீது கொண்ட அப்செட்டின் விளைவா என்ற விவாதம் தீவிரமடைந்துள்ளது. தனது தனித்துவமானப் பேச்சால் பல மேடைகளைத் தன் வசப்படுத்திய நாஞ்சில் சம்பத்தின் அடுத்தகட்ட அரசியல் நகர்வு என்னவாக இருக்கும் என்பதை அரசியல் உலகம் உற்று நோக்கத் தொடங்கியுள்ளது.