தமிழகத்தில் வரவிருக்கும் மதுராந்தகம் மற்றும் தாராபுரம் இடைத்தேர்தல் முடிவுகள் அக்டோபர் 9-ஆம் தேதி வெளியாகவுள்ள நிலையில், அதன்பின் தமிழக வெற்றிக் கழகத்தின் அமைச்சரவையில் மிகப்பெரிய மாற்றங்களைச் செய்ய முதல்வர் விஜய் திட்டமிட்டுள்ளதாகத் தகவல்கள் வெளியாகியுள்ளன. முதல்வரின் லண்டன் பயணத்திற்கு முன்பிருந்தே அமைச்சரவை மாற்றம் குறித்தான விவாதங்கள் நடந்துவரும் சூழலில், சர்ச்சைகளில் சிக்கியவர்கள் மற்றும் சரியாகச் செயல்படாத அமைச்சர்களை நீக்க முடிவெடுக்கப்பட்டுள்ளது. மேலும், தனது கட்டுப்பாட்டில் இருக்கும் நகராட்சி மற்றும் குடிநீர் வழங்கல் துறையை வேறொருவரிடம் ஒப்படைக்கவும், விஜய் பாலாஜி, ஜெகதீஸ்வரி, தென்னரசு, வினோத் ஆகியோரைப் பதவியிலிருந்து நீக்கவும் வாய்ப்புள்ளதாகக் கூறப்படுகிறது.
இந்த அமைச்சரவை மாற்றத்தில் மதுரை மாவட்டத்திற்குப் பிரதிநிதித்துவம் அளிக்கும் வகையில், மதுரையைச் சேர்ந்த தவெக எம்.எல்.ஏ ஒருவருக்கு அமைச்சர் பதவி வழங்கப்படலாம் என்ற செய்தி அரசியல் வட்டாரத்தில் பரவலாகப் பேசப்படுகிறது. தற்போது மதுரையில் சி.டி.ஆர். நிர்மல்குமார் மற்றும் காங்கிரஸ் கட்சியின் விஸ்வநாதன் ஆகியோர் அமைச்சர்களாகப் பொறுப்பில் இருந்தாலும், மதுரை மாநகராட்சி எல்லைக்குட்பட்ட பகுதிகளில் அமைச்சர்கள் எவரும் இல்லை. இதனால், விஜய் மக்கள் இயக்கத்தின் ஆரம்பக்காலப் நிர்வாகிகளான கல்லாணை மற்றும் தங்கப்பாண்டி ஆகிய இருவரில் ஒருவருக்கு வாய்ப்பளிக்க முதல்வர் திட்டமிட்டுள்ளார்.
இதன் காரணமாக, கல்லாணை மற்றும் தங்கப்பாண்டி ஆகிய இரு எம்.எல்.ஏ-க்களும் அமைச்சரவையில் இடம்பெறத் தீவிர முயற்சிகளை மேற்கொண்டு வருகின்றனர். இதில் தங்கப்பாண்டி, தவெக தலைவர் விஜய்யுடன் ஆரம்பக்காலம் முதலே பயணித்து வருபவர் என்பதோடு, ‘வேலாயுதம்’ பட ஆடியோ வெளியீட்டு விழாவிலும் நேரடியாகப் பணியாற்றியவர். மற்றொரு புறம், கல்லாணை புஸ்ஸி ஆனந்துக்கு மிகவும் நெருக்கமானவர் என்பதால், அவருக்கு அமைச்சர் பதவி கிடைக்க அதிக வாய்ப்பிருப்பதாகக் கட்சி வட்டாரங்கள் தெரிவிக்கின்றன.
மதுரையில் தவெக சார்பாக ஒரு புதிய அதிகார மையத்தை உருவாக்க அக்கட்சி முடிவு செய்துள்ளதாகத் தெரிகிறது. குறிப்பாக, மதுரை மாநகராட்சி எல்லைக்குள் மற்றொரு தவெக அமைச்சரை நியமிப்பதன் மூலம், சி.டி.ஆர். நிர்மல்குமாரின் அதிகாரப் போக்கிற்கு முற்றுப்புள்ளி வைக்க முடியும் எனக் கருதப்படுகிறது. மீனாட்சியம்மன் கோயில் அறங்காவலர் குழு விவகாரம் உட்பட நிர்மல்குமார் மீது பல்வேறு புகார்கள் விஜய்யிடம் சென்றுள்ள நிலையில், சமீபத்தில் மீனாட்சியம்மன் கோயிலுக்கு வந்த விஜய், பி.டி.ஆர். பழனிவேல் தியாகராஜனின் தாயார் ருக்மணியிடம் ஆசி பெற்றது குறிப்பிடத்தக்கது.