“சாரி டைம் முடிஞ்சு போச்சு”…. ஈரானுக்கு டிரம்ப் கொடுத்த அல்டிமேட்டம்… அடுத்தது என்ன?…. உச்சக்கட்ட பதற்றத்தில் உலக நாடுகள்….!

மத்திய கிழக்கில் இஸ்ரேல் மற்றும் ஈரான் இடையிலான போர் பதற்றம் உச்சகட்டத்தை எட்டியுள்ள நிலையில், ஈரானுடன் இனி எவ்வித அமைதிப் பேச்சுவார்த்தைக்கும் இடமில்லை என்று அமெரிக்க அதிபர் டொனால்ட் ட்ரம்ப் திட்டவட்டமாகத் தெரிவித்துள்ளார். இது குறித்து தனது ‘ட்ரூத் சோசியல்’ சமூக வலைதளப் பக்கத்தில் பதிவிட்டுள்ள அவர், ஈரான் இப்போது பேச்சுவார்த்தை நடத்த விரும்புவதாகவும், ஆனால் அதற்கான காலம் கடந்துவிட்டது என்றும் மிகக் கடுமையான தொனியில் குறிப்பிட்டுள்ளார்.

சவூதி அரேபியாவின் ரியாத் மற்றும் குவைத்தில் உள்ள அமெரிக்கத் தூதரகங்களைக் குறிவைத்து ஈரான் ட்ரோன் தாக்குதல்களை நடத்தியதாகத் தகவல்கள் வெளியாகியுள்ளன. இந்தத் தாக்குதல்களால் தூதரகக் கட்டிடங்கள் சேதமடைந்த போதிலும், அதிர்ஷ்டவசமாக உயிரிழப்புகள் ஏதும் ஏற்படவில்லை என அமெரிக்கா உறுதிப்படுத்தியுள்ளது. இதற்குப் பதிலடியாக இஸ்ரேலிய படைகள் ஈரானின் வான் பாதுகாப்பு மற்றும் ராணுவக் கட்டமைப்புகளைச் சிதைத்துள்ளதாகக் கூறப்படுகிறது.

ஈரானின் முக்கிய ராணுவ பலம் மற்றும் தலைமைத்துவம் பலவீனமடைந்துள்ள சூழலில், அமெரிக்கா தனது பிடியை மேலும் இறுக்கியுள்ளது. குறிப்பாக, ஈரானின் உச்ச தலைவர் அயதுல்லா அலி கமேனி கொல்லப்பட்டதாக வெளியான செய்திகளுக்குப் பிறகு, ஈரான் தரப்பில் பேச்சுவார்த்தைக்கான முயற்சிகள் எடுக்கப்பட்டதாகத் தெரிகிறது. இருப்பினும், “பேச்சுவார்த்தைக்கான நேரம் முடிந்துவிட்டது, இனி அதிரடி நடவடிக்கைகள் தான்” என்கிற ரீதியில் ட்ரம்ப் ஈரான் மீதான தனது நிலைப்பாட்டை வெளிப்படுத்தியுள்ளார்.

மறுபுறம், மத்திய கிழக்கில் நிலவும் இந்த அபாயகரமான சூழலைக் கருத்தில் கொண்டு, இஸ்ரேல் மற்றும் அண்டை நாடுகளில் உள்ள அமெரிக்க அதிகாரிகளும் குடிமக்களும் உடனடியாக வெளியேறுமாறு அமெரிக்க வெளியுறவுத் துறை அறிவுறுத்தியுள்ளது. எகிப்து வழியாக நிலப்பரப்பு மூலம் வெளியேறவும் ஆலோசனைகள் வழங்கப்பட்டுள்ளன. அமெரிக்காவின் இந்தத் தீர்க்கமான முடிவும், ஈரானின் தொடர் ஏவுகணைத் தாக்குதல்களும் இப்பிராந்தியத்தில் அமைதி திரும்புவதற்கான வாய்ப்பைக் கேள்விக்குறியாக்கியுள்ளன.