ஜெயிக்க வச்சா ரூ.4.25 லட்சம் தரும் ‘Trump Stimulus’….. அமெரிக்க தேர்தலை மாற்றப்போகும் ஒற்றை வாக்குறுதி… டிரம்பின் திடீர் மாஸ் அறிவிப்பு….!

அமெரிக்காவில் வரும் நவம்பர் மாதம் நடைபெறவுள்ள நாடாளுமன்ற இடைத்தேர்தல், ஆளும் குடியரசுக் கட்சிக்குக் கடுமையான சவாலாக உருவெடுத்துள்ளது. ஈரானுடனான போர்ச் சூழல் மற்றும் நாட்டில் தொடர்ந்து அதிகரித்து வரும் விலைவாசி உயர்வால் மக்களிடையே எழுந்துள்ள அதிருப்தி, கருத்துக்கணிப்புகளில் எதிரொலித்து வருகிறது. இந்தத் தேர்தலில் குடியரசுக் கட்சியின் வெற்றி வாய்ப்பு மங்கலாகவே இருப்பதாகக் கூறப்படும் நிலையில், வாக்காளர்களைத் தன் பக்கம் ஈர்க்கும் வகையில் டொனால்ட் டிரம்ப் அதிரடித் தேர்தல் வாக்குறுதி ஒன்றை அறிவித்துள்ளார். டல்லாஸ் நகரில் நடைபெற்ற கட்சியின் மாநாட்டில் உரையாற்றிய அவர், இடைத்தேர்தலில் குடியரசுக் கட்சி வெற்றி பெற்றால் அமெரிக்காவில் உள்ள அனைத்துப் பெரியவர்களுக்கும் தலா 5,000 டாலர் (சுமார் ரூ.4.25 லட்சம்) ‘டிரம்ப் ஊக்கத்தொகை’ (Trump Stimulus) வழங்கப்படும் என்று கூறி மேடையை அதிர வைத்துள்ளார்.

டிரம்பின் இந்த பிரம்மாண்ட அறிவிப்பு அமெரிக்க அரசியலில் பெரும் பரபரப்பை ஏற்படுத்தியிருந்தாலும், இதன் நடைமுறைச் சாத்தியங்கள் குறித்துப் பல கேள்விகள் எழுந்துள்ளன. நாடு முழுவதும் உள்ள லட்சக்கணக்கான பெரியவர்களுக்கு இந்த ஊக்கத்தொகையை வழங்க சுமார் 1 டிரில்லியன் டாலர் (சுமார் ₹85 லட்சம் கோடி முதல் ₹95 லட்சம் கோடி வரை) நிதி தேவைப்படும் என மதிப்பிடப்பட்டுள்ளது. இவ்வளவு பெரிய தொகையைச் செலவிட அமெரிக்க நாடாளுமன்றம் எளிதில் ஒப்புதல் அளிக்குமா என்பது சந்தேகத்திற்குரியதே. எனினும், பொருளாதாரச் சிக்கல்களால் தவித்து வரும் வாக்காளர்களைக் கவர டிரம்ப் கையில் எடுத்துள்ள இந்த பணப் பரிசு வாக்குறுதி, வரவிருக்கும் இடைத்தேர்தல் களத்தை மேலும் சூடேற்றியுள்ளது.