நடிகர் விஜய்யின் 52-வது பிறந்தநாளை முன்னிட்டு த்ரிஷா அவருக்கு வாழ்த்து தெரிவிக்காததும், அவரை இன்ஸ்டாகிராமில் அன்ஃபாலோ செய்துவிட்டதாக எழுந்த வதந்திகளும் ரசிகர்களிடையே பெரும் அதிர்ச்சியை ஏற்படுத்தியுள்ளன. விஜய் மற்றும் த்ரிஷா ஜோடி ‘லியோ’ படத்தில் 15 ஆண்டுகளுக்குப் பிறகு இணைந்து நடித்ததைத் தொடர்ந்து, அவர்களுக்குள் இருக்கும் உறவு குறித்து பல்வேறு சர்ச்சைகள் எழுந்து வந்தன. மேலும், விஜய்யின் மனைவி சங்கீதா நீதிமன்றத்தில் விவாகரத்து மனு தாக்கல் செய்ததாகக் கூறப்படும் சூழலில், விஜய்யும் த்ரிஷாவும் ஒரே நிற ஆடையில் ஒரு திருமணத்தில் கலந்துகொண்டதும், தற்போது இவர்கள் இருவரும் பிரேக்-அப் செய்துவிட்டதாகப் பலரும் யூகிப்பதற்குக் காரணமாக அமைந்துள்ளது.
இருப்பினும், த்ரிஷா விஜய்யை அன்ஃபாலோ செய்தார் என்ற சர்ச்சைக்குப் பின்னால் உண்மை இல்லை என்று அவர்களின் ரசிகர்கள் ஆதாரங்களுடன் மறுப்பு தெரிவித்து வருகின்றனர். உண்மையில் த்ரிஷா, விஜய்யை இன்ஸ்டாகிராமில் முதலிலிருந்தே பின்தொடரவில்லை என்பதே உண்மை எனத் தகுந்த ஆதாரங்களுடன் விளக்குகின்றனர். இதற்கு உதாரணமாக, த்ரிஷா தான் நடித்த ‘கருப்பு’ படத்தின் இயக்குனர் ஆர்.ஜே.பாலாஜியைப் பின்தொடரும் நிலையில், அதே படத்தில் கதாநாயகனாக நடித்த சூர்யாவையோ அல்லது தான் இணைந்து நடித்த மற்ற பல முன்னணி கதாநாயகர்களையோ அவர் இன்ஸ்டாகிராமில் பின்தொடர்வதில்லை என்பதைக் சுட்டிக்காட்டி இந்த விவாதங்களுக்கு முற்றுப்புள்ளி வைத்துள்ளனர்.
சினிமா வாழ்க்கையைப் பொறுத்தவரை, த்ரிஷா கிட்டத்தட்ட ஒன்றரை ஆண்டுகளுக்கு முன்பே படங்களில் நடிப்பதை நிறுத்திக் கொண்டார். ‘விடாமுயற்சி’, ‘குட் பேட் அக்லி’ போன்ற திரைப்படங்களிலும், சூர்யாவுடன் ‘கருப்பு’ திரைப்படத்திலும் நடித்து முடித்த பிறகு, அவர் வேறு எந்த புதிய படங்களிலும் ஒப்பந்தமாகவில்லை. தற்போது திரைப்பட உலகை விட்டு சற்று விலகி, பொது நிகழ்ச்சிகளில் மட்டும் கலந்துகொண்டு வரும் த்ரிஷா, அடுத்ததாக எந்தத் திரைப்படத்தில் நடிக்கப் போகிறார் என்ற எதிர்பார்ப்பும் கேள்வியும் ரசிகர்களிடையே பரவலாக எழுந்துள்ளது.