இந்தியாவின் கொல்கத்தாவைச் சேர்ந்த 28 வயது இளம்பெண் அனிஷா சக்கரவர்த்தி, பிரித்தானியாவின் பர்மிங்காம் நகரில் தனது பட்டப்படிப்பை முடித்துவிட்டு வேலை தேடிக்கொண்டிருந்தார். இந்நிலையில், தனக்கு ஒரு நல்ல வேலை கிடைத்துவிட்டதாக, அமெரிக்காவில் வசிக்கும் தனது அண்ணன் ரக்திமுக்கு வெள்ளிக்கிழமை இரவு ஒரு குறுஞ்செய்தி அனுப்பியுள்ளார். தங்கையிடமிருந்து வரப்போகும் அந்த நல்ல செய்தியைக் கேட்க அண்ணனும், இந்தியாவில் உள்ள அவரது தந்தையும் மிகுந்த ஆவலுடன் காத்திருந்தனர்.
தன்னுடைய மகிழ்ச்சியைக் கொண்டாடுவதற்காக அன்றைய இரவு அனிஷா தனது தோழிகளுடன் இரவு விடுதிக்குச் சென்றுள்ளார். பின்னர், அதிகாலை 2.00 மணியளவில் விடுதியிலிருந்து தங்கியிருந்த அறைக்குத் திரும்பிக்கொண்டிருந்தபோது, அவர் மீது அதிவேகமாக வந்த கார் ஒன்று பயங்கரமாக மோதியது. தகவலறிந்து காவல்துறை சம்பவ இடத்திற்கு விரைந்து வந்தபோதிலும், அனிஷா ஏற்கனவே பரிதாபமாக உயிரிழந்திருந்தார்.
அனிஷா மீது காரை மோதி விபத்தை ஏற்படுத்திய 22 வயது இளைஞரை காவல்துறையினர் கைது செய்தனர். அவர் மது போதையில் காரை ஓட்டி வந்தது விசாரணையில் தெரியவந்தது. வேலை கிடைத்துவிட்டதாக அண்ணனுக்குக் குறுஞ்செய்தி அனுப்பிய சில மணி நேரங்களிலேயே அனிஷா உயிரிழந்ததால், நல்ல செய்திக்காகக் காத்திருந்த அவரது குடும்பத்தினருக்குப் பேரதிர்ச்சியும் பெருந்துயரமும் ஏற்பட்டுள்ளது. தற்போது அனிஷாவின் உடல் இந்தியாவுக்குக் கொண்டுவரப்படுவதை எதிர்நோக்கி அவரது குடும்பத்தினர் கண்ணீருடன் காத்திருக்கின்றனர்.