பள்ளி மாணவர்களுக்கு குழந்தைகள் தினத்தை முன்னிட்டு முதல்முறையாக பிரம்மாண்டமான இனிப்பு விருந்து வழங்க தமிழ்நாடு அரசு திட்டமிட்டுள்ளது. இதற்காகத் தமிழ்நாடு நுகர்பொருள் வாணிபக் கழகம் சார்பில் டெண்டர் வெளியிடப்பட்டுள்ளது. இதன் மூலம் அரசு மற்றும் அரசு உதவி பெறும் பள்ளிகளில் சத்துணவு திட்டத்தின் கீழ் பயிலும் சுமார் 61.84 லட்சம் குழந்தைகள் பயனடைவார்கள் என அறிவிக்கப்பட்டுள்ளது.
இந்தச் சிறப்புத் திட்டத்திற்காக ரூ.9.27 கோடி நிதி ஒதுக்கீடு செய்யப்பட்டுள்ளது. மதிய உணவுடன் சேர்த்து மாணவர்களுக்கு வழங்குவதற்காக 45 கிராம் எடைக் கொண்ட பிராண்டட் ‘ஸ்பாஞ்ச் ஸ்லைஸ் கேக்’ (Sponge Slice Cake) தனித்தனி கவர்களில் பேக் செய்யப்பட்டு விநியோகிக்கப்பட உள்ளது. ஒரே சுவையாக இல்லாமல், மாணவர்கள் விரும்பி உண்ணும் வகையில் மிக்ஸ்டு ஃப்ரூட்/டூட்டி-ஃப்ரூட்டி, கிளாசிக் வெண்ணிலா, ரிச் சாக்லேட் மற்றும் வெண்ணெய்/பால் (Butter / Milk) ஆகிய 4 சுவைகளில் இக்கேக்குகள் வழங்கப்படவுள்ளன.
மாணவர்களின் உடல்நலப் பாதுகாப்பை உறுதி செய்யும் வகையில் கடுமையான தர விதிகளைத் தமிழ்நாடு அரசு நிர்ணயித்துள்ளது. கேக்குகள் மென்மையாகவும், பூஞ்சை மற்றும் கெட்ட வாடை இன்றியும் இருக்க வேண்டும். குறிப்பாக, டிரான்ஸ்-ஃபேட் (Trans-fat) மற்றும் தடை செய்யப்பட்ட செயற்கை நிறங்கள் அறவே இருக்கக்கூடாது என டெண்டரில் கண்டிப்புடன் தெரிவிக்கப்பட்டுள்ளது. மேலும், குடோனுக்கு வந்து சேரும்போதே குறைந்தது 30 நாட்களுக்குக் கெடாத ஆயுட்காலம் கொண்டதாக இக்கேக்குகள் தயாரிக்கப்பட்டிருக்க வேண்டும்.
ஒவ்வொரு கேக் கவரிலும் பிராண்ட் பெயர், சுவை, 45 கிராம் எடை, எப்.எஸ்.எஸ்.ஏ.ஐ (FSSAI) எண், தயாரிப்பு மற்றும் காலாவதி தேதிகளுடன் அரசின் லோகோவும் இடம்பெற வேண்டும். டெண்டரில் பங்கேற்கும் நிறுவனங்கள் அனைத்துச் சுவைகளிலும் மாதிரி கேக்குகளைச் சமர்ப்பித்துத் தரச்சான்றிதழ் பெற வேண்டும் என உத்தரவிடப்பட்டுள்ளது. நவம்பர் 14 குழந்தைகள் தினத்தன்று அரசுப் பள்ளி மாணவர்களுக்கு வழங்கப்படவுள்ள இந்த இனிப்பு விருந்து மாணவர்களிடையே மிகுந்த மகிழ்ச்சியை ஏற்படுத்தியுள்ளது.