தமிழக பொருளாதாரத்தில் கோவை மாவட்டம் முக்கிய பங்கு வகிக்கிறது. தொழில் நகரமான கோவை தற்போது கல்வி, மருத்துவம், சுற்றுலா மற்றும் தகவல் தொழில்நுட்பம் உள்ளிட்ட பல்வேறு துறைகளில் தேசிய அளவில் மட்டுமல்லாமல் உலக அளவில் புகழ்பெற்ற விளங்குகிறது. கோவை மாவட்டத்தின் வளர்ச்சிக்கு உதவும் விதமாக தமிழக அரசு தொடர்ந்து பல சிறப்பு திட்டங்களை செயல்படுத்தி வருகிறது. இதனைத் தவிர தொழில்துறையில் சிறந்து விளங்கும் கோவை மாவட்டத்திற்கு மேலும் பல நிறுவனங்கள் தொழில் தொடங்கும் வகையில் முதலீட்டாளர்கள் மாநாடு நடத்தப்பட்டு வருகிறது.
நேற்று கோவை அவிநாசி சாலையில் உள்ள தனியார் ஹோட்டலில் தமிழ்நாடு தொழில்துறை சார்பில் தமிழ்நாடு வளர்கிறது என்ற மூன்றாவது முதலீட்டாளர்கள் மாநாடு நடைபெற்றது. இந்த மாநாட்டில் முதல்வர் ஸ்டாலின் பங்கேற்று தொடங்கி வைத்தார். இதில் முதல்வர் ஸ்டாலின் முன்னிலையில் சுமார் 43,844 கோடி முதலீட்டில் புதிய தொழில்களுக்கான 158 புரிந்துணர்வு ஒப்பந்தங்கள் கையெழுத்தாகியுள்ளது. இதன் மூலம் சுமார் ஒரு லட்சத்து 709 இளைஞர்களுக்கு வேலைவாய்ப்பு கிடைக்கும் என்று தெரிவிக்கப்பட்டுள்ளது.