“திருவண்ணாமலையில் இப்படியா…? கிரிவலம் சென்ற 23 பெண்களுக்கு நேர்ந்த கொடூரம்… பதறவைக்கும் பின்னணி…!”

உலகப் பிரசித்தி பெற்ற ஆன்மீகத் தலமான திருவண்ணாமலையில், பௌர்ணமி மற்றும் விசேஷ நாட்களில் லட்சக்கணக்கான பக்தர்கள் கிரிவலம் செல்வது வழக்கம். உள்நாடு மட்டுமின்றி வெளிநாடுகளில் இருந்தும் ஏராளமான பெண் பக்தர்கள் ஆன்மீகப் பயணமாக இங்கு வந்து செல்லும் சூழலில், கிரிவலம் சென்ற பெண்களுக்கு நேர்ந்த கொடூரச் சம்பவம் ஒட்டுமொத்த தமிழகத்தையும் அதிர்ச்சியில் ஆழ்த்தியுள்ளது. கிரிவலம் முடித்துத் திரும்பிய பெண்களை வழிமறித்து, நிர்வாணமாக வீடியோ எடுத்துப் பணம் பறித்த ஒரு கொடூரக் கும்பலின் செயல் தற்போது வெளிச்சத்திற்கு வந்து பெரும் பரபரப்பை ஏற்படுத்தியுள்ளது.

கடந்த மாதம் தர்மபுரி மற்றும் திருவண்ணாமலை பகுதியைச் சேர்ந்த இளம் பெண்கள் கிரிவலம் முடித்துவிட்டு, அய்யம்பாளையம் ஏரிக்கரை பகுதியில் தனியாகச் சென்றுள்ளனர். அப்போது அங்கு மது அருந்திக் கொண்டிருந்த நான்கு பேர் கொண்ட கும்பல், அந்தப் பெண்களிடம் பாலியல் சில்மிஷத்தில் ஈடுபட்டுள்ளது. அதுமட்டுமின்றி, தங்களின் மேலும் சில நண்பர்களை அந்த இடத்திற்கு வரவழைத்து, பெண்களைக் கட்டாயப்படுத்தி நிர்வாணமாக்கி வீடியோ எடுத்துள்ளனர். பின்னர், அவர்களின் பணம் மற்றும் செல்போன்களைப் பறித்துக்கொண்டதோடு, தங்களுக்குத் தொடர்ந்து பணம் தராவிட்டால் இந்த வீடியோக்களை இணையத்தில் வெளியிட்டு விடுவோம் என்றும் மிரட்டிச் சென்றுள்ளனர்.

பாதிக்கப்பட்ட பெண் இதுகுறித்து தைரியமாகத் திருவண்ணாமலை நகர காவல் நிலையத்தில் புகார் அளித்துள்ளார். இந்தப் புகாரின் பேரில் போலீசார் தீவிர விசாரணை நடத்தியபோதுதான், அந்த கும்பலின் பின்னணியில் இருந்த அதிர்ச்சி உண்மைகள் அம்பலமாகின. இந்த கொடூரக் கும்பல் அந்தப் பகுதியைச் சேர்ந்த சுமார் 23 பெண்களை இதேபோன்று நிர்வாணப்படுத்தி, வீடியோ எடுத்துப் பணம் கேட்டு மிரட்டியிருப்பது விசாரணையில் தெரியவந்தது. இதையடுத்து, இந்த வழக்கில் தொடர்புடைய 10 பேர் கொண்ட கும்பலை போலீசார் அதிரடியாகக் கைது செய்தனர். அவர்களில் ஒருவர் மைனர் என்பதால் சிறுவர் சீர்திருத்தப் பள்ளிக்கு அனுப்பப்பட்டார்.

கைது செய்யப்பட்டவர்களில் வாசுதேவன், ஆகாஷ், அப்பு, ஹரிகரன், அருண்குமார், சூர்யா, அருள்பாண்டியன் உள்ளிட்ட 8 பேர் கொண்ட கும்பல் மீது தற்போது கடுமையான குண்டர் தடுப்புச் சட்டம் பாய்ந்துள்ளது. இவர்கள் அனைவரும் வேலூர் மத்திய சிறையில் அடைக்கப்பட்டுள்ளனர். புனிதத் தலமான திருவண்ணாமலையில் பெண்களுக்கு எதிராக அரங்கேறியுள்ள இந்த வன்முறைச் சம்பவம் கிரிவலம் செல்லும் பெண் பக்தர்களிடையே பெரும் அச்சத்தை ஏற்படுத்தியுள்ளது. தமிழகத்தில் சட்ட ஒழுங்கு மற்றும் பெண்களின் பாதுகாப்பை உறுதி செய்ய அரசு இன்னும் கடுமையான பாதுகாப்பு மற்றும் கண்காணிப்பு நடவடிக்கைகளை மேற்கொள்ள வேண்டும் என்று சமூக ஆர்வலர்கள் வலியுறுத்தி வருகின்றனர்.